Орусиянын тышкы иштер министри Сергей Лавров Дональд Трамп АКШдагы президенттик шайлоодо жеңип, бийликке кайтып келген күндө да Украинадагы кырдаал өзгөрбөй турганын билдирди. Бул тууралуу ал CBS телеканалына берген маегинде билдирди.

Анын айтымында, Москва менен Вашингтондун мамилесинин начарлашы кичи Жорж Буштун тушунда башталган.

«Мен эч кандай айырма бар деп ишенбейм, анткени орус-америкалык мамилелердин бузулушу, анын негизи стратегиялык туруктуулук, паритет, өз ара ишеним, инспекция, ачыктык, ишенимди бекемдөө боюнча келишимдер – мунун баары президент Жорж Буштун тушунда башталган", - деди Лавров.

Орус дипломатиясынын башчысы кенже Буш 1972-жылы кол коюлган баллистикалык ракеталык системаларды чектөө боюнча келишимден АКШны бир тараптуу чыгаруу чечимин кабыл алганын эске салды. Лавров АКШ саясатчылары СССР кулагандан кийин Вашингтон жүргүзгөн кабыл алынгыс саясаттан бир дагы сабак ала электигин баса белгиледи.

Мындан тышкары, Лавров АКШнын азыркы администрациясы Орусия менен диалог түзүүгө кызыкдар эмес экенин билдирди. Анын айтымында, Вашингтон элчиликтердин ишмердүүлүгүнө же туткундарды алмаштырууга байланышкан маселелерди чечүү зарыл болгондо гана Москвага өзгөчө жагдай катары кайрылат. Бирок, Ак үй саясий маселелерди талкуулоого кызыкдар эмес.

Эске салсак, Дональд Трамп президенттик жарышка чыккандан бери Ак үйгө кайтып келсе, Украинадагы согушту 24 сааттын ичинде токтоторун бир нече жолу айткан. Тактап айтканда, 20-январда Нью-Гэмпширде тарапкерлери менен жолугушууда ал АКШ президенттигине кайра шайланса, Украинадагы жаңжалды инаугурацияга чейин чечүүгө убада берген.

Булак: NazarNews.kg