Экс-президент Сооронбай Жээнбеков добуш берди

Журналист: МЭЭРИМАЙ АЛЫБЕКОВА

11.04.2021, 20:13

18591

саясат

Мурдагы Сооронбай Жээнбеков бүгүн, 11-апрелде Бишкектеги №1327 шайлоо тилкесинде жергиликтүү кеңештердин депутаттарын шайлоо жана Конституциянын жаңы долбоору үчүн референдумга добушун берди.

Сооронбай Жээнбеков кимге добуш бергендигин ачык айткан эмес.

«Шайлоо күнүндө үгүт жүргүзүүгө тыюу салынган. Ар бир жаран кимге добуш бергенин купуя сыр катары сактоого укуктуу. Негизгиси жарандык милдетимди аткардым», – деп билдирген ал.

11-апрелде Кыргызстанда жергиликтүү кеңештердин депутаттарын шайлоо жана референдумга добуш берүү өтүп жатат.

Эртең мененки саат 08.00гө карата өлкөдөгү добуш берүү тилкелери ачылды. Жалпы 2 миң 483, чет өлкөлөрдө 48 шайлоо тилкеси түзүлгөн.

Өлкөнүн 448 жергиликтүү кеңештеринин депутаттарын шайлоо, анын ичинде 420 айылдык кеңеш жана 28 шаардык кеңештин депутаттарын шайлоо өтөт.

Ошондой эле Конституциянын жаңы долбоорун кабыл алуу боюнча референдумга добуш берүү да башталды. Ага жалпы шайлоочулардын 30% катышса, референдум өттү деп эсептелет.

Бишкек шаардык кеңешине 25 партиядан 1815 талапкер ат салышууда, Ош шаардык кеңешине өтүп жаткан шайлоого 9 партиядан 701 талапкер катышууда.

Кыргызстанда жергиликтүү кеңештердин депутаттарын шайлоо жана референдум үчүн добуш берүүгө 3 млн 318 миң шайлоочу катталган.

Булак: NazarNews.kg