Мэр Айбек Жунушалиев «Көк-Жар» конушунун №172 контурунда көп кабаттуу үйлөр курулушу мүмкүн экенин жокко чыгарбады.

Мэр мыйзамсыз курулган үйлөрдү бузуу мыйзам чегинде жүргүзүлүп жатканын, ага ылайык айыл чарба багытындагы жерлерге турак жай курууга болбой турганын белгиледи. Бирок бул жерлерде бузуу иштеринен кийин эмне болору, борбор калаанын 2050-жылга чейинки өнүгүүсүнүн жаңы башкы планы кабыл алынгандан кийин белгилүү болот, ал ушул жылдын аягында кабыл алынат.

Бул жерлер айыл чарба жерлерине айландырылабы же ал жерге көп кабаттуу үйлөр курулабы деген тактоочу суроого мэр төмөнкүдөй жооп берди:

«Жарым жылдан кийин 2050-жылга чейинки жаңы башкы план кабыл алынат. Ал кабыл алынгандан кийин ал жерде эмне болору белгилүү болот: жол, бала бакча же көп кабаттуу үйлөр»

Эскерте кетсек, акыркы бир нече күндөн бери борбор калаада «Көк-Жар» турак массивинин №172 контурунун айланасында чыр чыкты. Мэриянын маалыматы боюнча, ал жерде 149 үй мыйзамдаштырылат, калгандары жер амнистиясынын критерийлерине жооп бербегендиктен бузулушу керек. Мэрия участокторго мурдагы багытын — айыл чарба багытын кайтарууну пландаштырууда.

5-августта мэрия турак эмес курулуштарды бузууну баштады, ал эми үйлөрдүн ээлерине алты айдын ичинде ыктыярдуу демонтаждоо зарылдыгы жөнүндө эскертүү тапшырды. 6-августта демонтаждоо иштеринин жүрүшүндө калк менен милиция кызматкерлери кагылышып, натыйжада 22 адам кармалып, алардын бешөө шектүү катары СИЗОго киргизилди.