Казакстандын Ички иштер министрлигине караштуу жаза аткаруу тутумунун мурдагы кызматкери Чымкенттеги бир тууган эже-сиңдини топтошуп зордуктоо ишинде шектүү катары өтүп жатат. Бул тууралуу КазТАГ агенттиги кабарлады.

Маалыматта зордуктоо иши боюнча шектелип жаткан жаза аткаруу тутумунун мурдагы кызматкеринин аты-жөнү, ал иштеген мекеменин аталышы жана жайгашкан жери жөнүндө жазылган эмес.

Буга чейин "Не молчи" фонду жергиликтүү медиктердин бирине таянып, ооруканага өз өмүрлөрүнө кол салууга аракет кылган эже-сиңди жеткирилгенин, алар полиция кызматкерлери тарабынан сексуалдык зомбулукка кабылганын билдирген.

Көп өтпөй Чымкент шаардык ички иштер департаменти 15 жана 21 жаштагы бир туугандарды зордуктоого шектүүлөр кармалганын билдирген. Анда ЖМКлар шектүүлөрдүн бири ИИМ системасында иштегенин кабарлашкан.