11-декабрда Бишкектин Биринчи май райондук соту Бишкектеги саясий партиянын митингинде террордук акт уюштурууну пландаган Өзбекстандын жаранына карата өкүм чыгарды. Бул тууралуу соттун буйругунда айтылат.

Айыпталучу – Бишкек шаарында жашаган 1983-жылы туулган Өзбекстандын жараны Б.К. Ал толук эмес жогорку билимдүү, эч жерде иштеген эмес, ажырашкан, мурда соттолбогон.

“Ислам дининин канондук негиздерин жакшы билгендиктен, кээ бир диний агымдардын радикализмин билгендиктен, ал Хаят Тахрир аш-Шам эл аралык террористтик уюмунун идеологиясын терең изилдей баштаган. “Джабхат ан-Нусра” жана “Хаят Тахрир аш-Шам” Борбордук Азия өлкөлөрүнүн, анын ичинде Кыргызстандын конституциялык түзүлүшүн бузуп, “Халифат” деп аталган ислам мамлекетин түзүү максатын көздөйт”, – деп айтылат маалыматта.

2020-жылдын август-сентябрь айларында Б.К. оппозициялык саясий партиялардын тарапкерлерин колдоо шылтоосу менен Кыргызстандагы кырдаалды дестабилдештирүү максатында террордук акт уюштуруу үчүн колго жасалган жарылуучу зат жасоону пландаштырган. Ал Facebook социалдык тармагы аркылуу оппозициялык саясий партиялардын тарапкерлери тынчтык митингине чыгууга ниеттенип жаткандыгын билген. Б.К. ал жерде көп сандаган адамдардын катышаарын жана жарылуунун кесепети эң чоң зыян келтирээрин билген.

Б.К. колго жасалган жарылуучу затты жасоо боюнча көрсөтмөлөрү бар материалдарды жана адабияттарды активдүү изилдеп чыккан. Мындан тышкары, Б.К. өзүнүн шериктерин издеп, андан ары террористтик актыны жасоого шарт түзүп берген.

Ал КР УКМКнын кызматкерлери тарабынан кармалган. Сот Б.К.ны террордук акт жасоого даярдангандыгы үчүн күнөөлүү деп таап, 2 жыл 6 айга эркинен ажыратуу өкүмүн чыгарды. Жазасын өтөп бүткөндөн кийин ал Кыргызстандын аймагынан чыгарылат.

Булак: NazarNews.kg