РФ президентинин жардамчысы Юрий Ушаков Владимир Путиндин АКШ өкүлдөрү Стив Уиткофф жана Жаред Кушнер менен жолугушуусунун чоо-жайын билдирди. Сүйлөшүүлөр 5-сентябрда Кремлде өтүп, үч сааттан ашык убакытка созулган.

Путин АКШ президенти Дональд Трамптын атайын өкүлдөрүнө фронттогу кырдаалга байланыштуу баасын билдирип, жаңжалдын түпкү себептерин жоюу зарылдыгын баса белгилеген. Ушаковдун айтымында, Уиткофф менен Кушнер Путинден алган тыянактарын Киевде боло турган алдыдагы сүйлөшүүлөрдө колдонууга ниеттенүүдө.

Орусия президентинин жардамчысы Юрий Ушаков Кремлдеги сүйлөшүүлөрдүн жыйынтыгы боюнча билдиргендей, АКШ президентинин атайын өкүлү Стив Уиткофф жана Дональд Трамптын күйөө баласы Жаред Кушнер Украинадагы жөнгө салуу маселеси боюнча Орусиянын лидери Владимир Путиндин баасын Киевге жеткирүүгө убада беришкен.

Бир күн мурда Орусиянын президенти Уиткофф жана Кушнер менен үч сааттан ашык сүйлөшкөн. Ушаков бул сүйлөшүүнү «мазмундуу, конструктивдүү, өтө ачык жана ишенимдүү» деп мүнөздөдү. Орусия президентинин жардамчысы орус тарап америкалык өкүлдөргө Украинадагы атайын аскердик операция жүрүп жаткан аймактагы кырдаал боюнча «так жана толук баа» бергенин белгиледи.

«Тактап айтканда, согуш аракеттери жүрүп жаткан аймакта орус армиясынын алдыга жылышындагы реалдуу ийгиликтер белгиленди, коюлган максаттарга жетүүгө ишеним билдирилди жана, албетте, жаңжалдын бардык түпкү себептерин жоюу зарылдыгы баса белгиленди», — деп анын сөздөрүн «Интерфакс» келтирди.

Ошол эле учурда Орусиянын лидери саясий-дипломатиялык чечимди издөөгө багытталган АКШ менен биргелешкен ишти улантууга даяр экенин дагы бир ирет ырастаганын президенттин жардамчысы кошумчалады.

Ошондой эле Юрий Ушаков америкалык өкүлдөр сүйлөшүүлөргө «олуттуу даярданып келгенин» белгиледи. Алар согуш аракеттерин мүмкүн болушунча тез арада токтотуу каалоосун билдирүү менен гана чектелишкен эмес.