Орус президенти Владимир Путин Орусия Украинада «али олуттуу эч кандай аракетин баштай элек» деп билдирген чакта орус аскерлери Донбасста көзөмөлүн орнотуу максатында алдыга жылуу үчүн кайрадан абадан көп сокку урганын украин тарап билдирди. Авиа соккулардын бири Харьковдо үч адамдын өмүрүн алып, дагы беш адамды жарадар кылды.

Донецк аскердик администрациясынын башчысы Павел Кириленконун айтымында, Орусиянын аба соккулары Краматорск жана Авдеевка шаарларындагы объекттерди бутага алды.

Луганск облусун толук өзүнө баш ийдирип, Краматорск жана Славянск шаарларында топтолуп турган орус аскерлери азыркы тапта Донецк аймагын аткылоодо.

Украинанын президенти Владимир Зеленский 8-июлга караган түнкү кайрылуусунда коргонуу үчүн аскердик жардам канчалык көбүрөөк келсе, согуш ошончолук эрте аяктай турганын баса белгиледи.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Ошондон кийин АКШ жана НАТО өлкөлөрү Орусияга карата буга чейин болуп көрбөгөндөй катаал санкциялык чектөөлөрдү киргизген. Москва Батыштын мындай аракетин "экономикалык согуш" деп атоодо.

Үч айдан ашкан согушта эки тараптан тең аскерлер жана жайкын тургундардан миңдеген курмандыктар катталды. 

Булак: NazarNews.kg