Орусия Федерациясынын Президенти Владимир Путин Москва жер семирткичтерди экспорттоону кеңейтүүгө жана бул жаатта бардык өнөктөштөрү менен иштешүүгө даяр экенин билдирди. Бул тууралуу ТАСС жазып чыкты.

«Биз бардык өнөктөштөрүбүз менен бул ишти эч кандай чектөөсүз кеңейтүүгө даярбыз», - деди мамлекет башчы бүгүн, 23-ноябрда Орусиянын өнөр жайчылар жана ишкерлер союзунун минералдык жер семирткичтер боюнча комиссиясынын төрагасы Дмитрий Мазепин менен болгон жолугушуусунда.

«Дүйнөлүк жер семирткич базарларындагы абал адис эместерге да жакшы маалым», - деди президент.

Ал Дмитрий Мазепинге азыркы кырдаал боюнча доклад жасоону тапшырды.

«Сиздердин «Уралхим» компаниялар тобу дүйнөдөгү эң ири азот жер семирткичтерин, калий жер семирткичтерин жана аммиак өндүрүүчүлөрдүн бири болуп саналат. Иш жүрүп жатканын билем, кээ бир мамлекеттер тарабынан түзүлгөн жасалма тоскоолдуктарга карабастан, иш абдан жакшы жүрүп жатат», - деди президент.

Андан ары ал Орусияга каршы санкциялардан дүйнөлүк рыноктор гана жабыркай турганын айтты.

Белгилей кетсек, 2022-жылдын сегиз айында Орусияда минералдык жер семирткичтерди өндүрүү өткөн жылдын ушул мезгилине салыштырмалуу 2,5%га кыскарган. Ошол эле учурда өндүрүш 2019 жана 2020-жылга салыштырмалуу 10,5 жана 4 пайызга өскөн. 2022-жылдын январь-август айларында калий жер семирткичтерин өндүрүү эң көп азайды - 25,1%, азоттук жер семирткичтердин көрсөткүчтөрү - 6,3% азайды, карбамид өндүрүү - 6,1%, аммиак селитрасын өндүрүү - 10,1%га өстү. Жалпысынан жер семирткичтердин экспорту 11 пайызга кыскарган, мында аммиак селитрасы (дээрлик 50 пайыз), хлордуу калий (24,8 пайыз) жана карбамид-аммиак аралашмасы (32,2 пайыз) негизги азайган. Орусиядан минералдык жер семирткичтерди сатып алууга түздөн-түз тыюу салынбаганына карабастан, бул Европада суроо-талаптын азайышы жана логистикалык кыйынчылыктарга байланыштуу.

Булак: NazarNews.kg