Россиянын президенти Владимир Путин мамлекеттик туу күнүнө карата видеокайрылуу жасап, андагы үч түстү өлкөнүн биримдигинин символу деп атады.

"Россия - миң жылдык өлкө жана цивилизация. Биздин мамлекеттик желегибиз биздин биримдигибиздин символу. Бул желек менен биз көптөгөн кыйынчылыктарды, сыноолорду жеңдик, бирок чындыгында өлкөбүздүн эгемендүүлүгүн калыбына келтирдик", - деп Путин баса белгиледи.

Ал мамлекеттик туу ар дайым алдыга, жеңишке гана илгерилей берээрине, ошондой эле "Россиянын даңкын бекемдейт" деген ишенимин билдирди.

Белгилей кетсек, 1991-жылдын 22-августунда Россия Советтик Федеративдик Социалисттик Республикасынын Жогорку Кеңеши "Россия Советтик Федеративдик Социалисттик Республикасынын мамлекеттик желегин расмий таануу жана колдонуу жөнүндө" токтом кабыл алган. Документке ылайык, Россиянын тарыхый желеги (горизонталдуу ак, көгүлтүр жана ачык кызыл) Россия Федерациясынын расмий мамлекеттик желеги катары таанылышы керек. 1993-жылы Россиянын мамлекеттик желеги жөнүндө жарлык чыгып, кездеменин көгүлтүр түсүн көккө, ачык кызыл түсүн кызылга алмаштырган. Желек күнү Россиянын президенти Борис Ельциндин жарлыгы менен 1994-жылы белгиленген.

Булак: NazarNews.kg