Президенттик шайлоо аяктады, бирок Садыр Жапаровдун мамлекет башына келгенине үч ай болгонун эч ким танбайт. Үч ай боюу жакынкы коңшубуз Орусия президенти Владимир Путин мелтиреп үн каткан жок. Эми Садыр Жапаровду телефон менен эмес, инстаграм аркылуу кимдир –бирөөгө куттутуктоо жаздырган окшойт. Дүйнөлүк дипломатия үчүн бул катардагы иш, Кыргыз Республикасынын жаңы шайланган президенти «Его Превосходительства господин Путин» каалабаса да куттукташ керек. Эмне үчүн Путин Жапаровду телефон аркылуу өз оозу менен куттуктабайт?

“Кыргызстандагы президенттик шайлоонун лидери Садыр Жапаровдун Москвага сапары сөзсүз болот, анын датасы Россия тараптан көз каранды, ал эми азыр расмий сунуштар боло элек”,- деп Кыргызстандын тышкы иштер министри Руслан Казакбаев маалымдаган.

Албетте, Путин Жапаров Кыргызстандын ЕврАзЭС, ЖККУ, КМШ жана ШКУнун алкагында болгондуктан куттуктагандыр, ага Садыр Жапаров жооп берди:

​​​«Урматтуу Владимир Владимирович, мен сизге Кыргыз Республикасынын Президентинин кызмат ордуна шайлангандыгыма байланыштуу жылуу куттуктоолоруңуз үчүн чын жүрөктөн ыраазычылыгымды билдирем. Биздин элибиздин ортосундагы көп жылдык достук, өз ара түшүнүшүү жана колдоо мамилелеринин негизинде Кыргыз Республикасы ар дайым Россиянын ишенимдүү жана туруктуу өнөктөшү болгон жана болуп кала берээрин чоң канааттануу менен билдиргим келет.

Мен Кыргыз-Орус мамилелери мындан ары да эки мамлекеттин кызыкчылыгы үчүн союздаштык жана стратегиялык өнөктөштүк рухунда динамикалуу түрдө жана жемиштүү өнүгө берет деп ишенем.

Сизге, урматтуу Владимир Владимирович, чың ден-соолук жана жооптуу мамлекеттик ишмердүүлүктө ийгилик, ал эми Россия элине бакубатчылык жана гүлдөп өнүгүү каалайм. Сиз менен тез арада жолугушуп, кыргыз-орус кызматташтыгынын актуалдуу маселелерин талкуулоо үчүн чыдамсыздык менен күтөм».

Азизбек КЕЛДИБЕКОВ, NazarNews.kg