Белгилүү эстрада ырчысы Съездбек Искеналиев кыргыз киносунун көркүн ачып көптөгөн мыкты эркектин ролдорун аткарып жүрөт. Голливудда же Болливудда, мына бул эле Орусияда мыкты эркектин ролун аткарган киноартисттер өздөрүн «секс-бомбабыз» дешип сыймыктанышат. Кыргызстанда этикадан чыкпай «секс-бомбабыз» деп айтышкандан уялат, бирок сулуу кыз-келиндерди көрсө эле сүрөткө түшө беришет. Съездбек Искеналиев деле чыкыйып экс-канайым Атамбаева Раиса Минахмедовна сыяктуулар менен сүрөткө түшө берет.

Социал -демократтар партиясы парламенттик шайлоодо адамдын боору ооруй тургандай аянычтуу аутсайдерлердин катарына кошулду. Раиса Атамбаева Атамбаевдин экинчи никеси экенин элдин баары билет. Ошол эле убакта Атамбаев дагы Раиса айымдын экинчи никеси. Экс-канайымдын биринчи никесинен кадыресе каруу-күчкө толуп калган уулу бар экени да белгилүү.Экс-ажонун мурдагы шопуру Икрам Илмиянов «кожоюнунун» алты жылдык президенттик мөөнөтүндө үлкөн чиновникке айланып, кадр маселесинен тарта финансы маселесине чейин кийлигишкен таасирдүү фигура болгону белгилүү. Анан ал өлкөбүздө 2017-жылы бийлик алмашкандан кийин алда неден чоочулап, бирде ажылык сапарды шылтоолоп, бирде апасынын ден-соолугун бетине кармап эле Кыргызстандан качып калган болчу. Бирок 2018-жылы аны кармап келишип өз жазасын өзү тартып жатат.

Көрсө ал эч кандай апасынын ден-соолугуна камкордук көрбөй эле Татарстандын борбору Казан шаарындагы экс-канайым Раиса Атамбаева түптөп койгон бизнеске көзөмөлдүк кылып жатканын маалымат булактары жазып чыгышууда. Тактап айтсак, ал бизнести Атамбаевдин заманында Раиса айымдын биринчи никесинен төрөлгөн баласы менен Икрам Илмиянов биргеликте көзөмөлдөөчү экен.

2018-жылы Илмиянов Кыргызстандын атайын кызматы тарабынан Москвадан кармалып, Кыргызстанга алынып келингенден кийин эле жада калса Орозо айт күнү элибизди куттуктап коюуга жарабай, ден-соолугун шылтоолоп эле жүргөн Алмаз Атамбаев Орусияга жеңесинин тажиясын шылтоолоп шашылыш жашырынып жөнөгөн. Дурусураак шылтоо табаалбаганына өзү деле бир аз кейисе керек, бирок анын бул жолку сапарынын негизги максаты жогорудагы себеп эмес, Казан шаарындагы бизнесине сарсанаа болгонунан улам жасалган сапар болгон экен. Ал Орусияга барып, ал жактан өзүнүн ишенимдүү адамдарынын бирине ошол Казан шаарындагы бизнесин «жакшылап иштет» деп тапшырып келген дешет.

Демек, ал өгөй баласына же Раиса айымдын биринчи никесинен төрөлгөн баласына ишенбей турганын түшүнө берсек болот. Бул тууралуу Орусиянын маалымат булактары жазып чыккан.

Алмазбек Атамбаев саясаттан обочолонуп калгандыктан, Атамбаевдин жолун улантууну каалашып Сейит, Кадыр деген балдары - "Социал-демократтар" же Кыргызстан социал-демократтар партиясы деген аталыш менен жаңы партия түзүшкөн. Ирина Карамушкина ушул партияга өтүп, саясатта “сары ооз” балапандар Атамбаевдин уулдары үчүн “серый кардиналдын” милдетин аткарып жүрдү. Атамбаевди жиниктире таманын жалап жүргөн Адил Турдукулов тиешелүү учурда Атамбаевдин жан –шеригине айланып, эми кайрадан Алмазбек Атамбаевдин балдарынын саясый көрөңгөсү жок деп ай –ааламды жаңырта кыйкыра баштады. Мында Адил Турдукуловдун "бул көрүнүш Алмазбек Атамбаевдин балдарынын саясый көрөңгөсү жок экенинин далилдейт. Алар ушундай оор кырдаалда КСДП мүчөлөрүн бир муштумга бириктирүүгө басым жасап, идеялаш саясатчыларды бир партияга чакырыш керек эле. Бирок, Атамбаевдин балдары өздөрүнчө кайрылуу жасап, ар кандай иш чараларды өткөрүп жатат" деп кейигенинде негиз бар. СДПКчы Артыков СДПКнын саясий кеңешинин мурунку мүчөсү Адил Турдукуловдун кимдир бирөөнүн “Социал-демократтарды” бөлүү буйругун аткарып жаткандыгын четке каккан эмес.

2019-жылы аларга каршы "Кой-Таш республикасынын" активдүү катышуучуларынын бири, бир буту парламентте турса, экинчи буту мажбурлап эс алдыруучу жайлардын бирине жакындап калган Ирина Карамушкина КСДПнын убактылуу лидери Асел Кодуранова менен Кундуз Жолдубаева Алмазбек Атамбаевди ачык колдобой А.Турдукулов тарапка ооп, Атамбаевди сатып кеткен Туйгуналы Абдраимов менен сүйлөшүүлөрдү жүргүзүп жаткандыгын, ошондуктан жаңы СДнын түзүшкөндүгүн, мындан ары жаңы партиянын бардык иш чаралары жогорудагы үчөөсү катыштырылбай өтө тургандыгын айтып чыккан. Андай "дискриминацияга" жогорудагы үчөөсүнүн нааразы болбой тургандыгы, тескерисинче одиоздуу инсандардан ажырымдашкандыгына кубаныша тургандыгы айтпаса да түшүнүктүү эле. Ирина Карамушкинаны башкы идеолог кылып алышып, жогоруда айтылгандай иштерди жасашкан АШАнын балдарынын бул жоруктарын саясый рейдерлик катары гана баалоого болмок. Бир партияны түзө коюп, аны эч кандай легитимдүү иш чараларсыз экинчи партиянын мураскору деп жарыялап, анын атрибутика, символикаларын пайдаланганы чыныгы уятсыздыктын жеткен чеги эле. Эмне дебейли, КСДП алардын атасынан түздөн түз мураска калган "Форум", "Апрель" же Кой-Таштагы 2 гектар жерди ээлеген хансарай эмес, коллегиалдуу саясый уюм. КСДПнын № 1-си болобу же №2-би анын тагдырын, кандай формаларда трансформациялануусун легитимдуү курултай гана чечиши керек эле. Эгерде АШАнын балдары андай жол менен эки КСДПнын бирине мураскорлукка жетишсе, эч ким эч нерсе демек эмес. Бирок, андай мыйзамдуулукту эске албастан атасы убагында жазуучуларга бөлүнгөн 60 миллион рублди, Арашандагы эс алуу жайын, "Нооруз" кафесин, Ө.Текебаевдин "Сентябрь" телеканалынын мүлктөрүн тартып алып, Бишкек ЖЭБин модернизациялоодо, жогорку чыңалуудагы Датка-Кемин электр чубалгылары линиясын, Чолпон-Атадагы ат майданды курууда, Тарых музейин оңдоп, ремонттоодо ири коррупциялык долбоорлорду ишке ашыргандай эле балдарынын да экиге бөлүнгөн партиянын бир жагын тартып алышканы - алардын ыймансыздыктары, бетпактыктары жагынан атасынан да ашып кеткендиктерин айгинелейт.

Чындыгында экиге бөлүнгөн КСДПнын аты эле калбаса, затында, аброй таасиринде эч нерсеси деле калган эмес. Коррупционерлердин, лидерлери мыйзамдуулукка каршы иш кылган бандиттердин, укуктук нигилисттердин партиясы катары көө шыбалды, эл арасында терс имиджи бекемделген. Азыр элдин басымдуу көпчүлүгү КСДП дегенди угушканда жипкиринишерин көрүп жатабыз. Ага жабышкан кара көөнү "айна" менен эки жыл тынбай жууса да кетпей жүрүп, эми гана унута баштады.

2019-жылы эки КСДП тең, ага өзүн биринин мураскорумун деген үчүнчү СД дегени кошулуп, шаардык жана парламенттик парламенттик шайлоолорго катыша баштады. Бизде бир эмес, он партия жоюлуп кетсе деле, алдыга оозуп бараткан партияларга мүчө боло коюп, чоң кызматтарга жетишкендер деле кабагым кашым дебестен башка иши жүрүшө баштаган партияга өтүп кетишет.

Экс-президент Атамбаев СДПК партиясынан жана анын клондору болгон башка партиялардан депутат болуп келген парламентке «чимкириктер» -деген көрүнүктүү наам берген. Анын жинденип «ПК» тамгасын жыга чаап СД партиясын түзгөнү тууралуу айттык. СДПК партиясы сыяктуу СД партиясы саясаттан сүрүлүп, ара жолдо жүрө баштады. 2020-жылдын 4-октябрында миллиондорду чачкан СД партиясы парламентке өтпөй калып, аябагандай жеңилүү ызасын тартып, АКШнын жардамы менен башаламандык уюштуруп, лидери Атамбаевге эркиндик алып берген. 2020-жылы мурунку президенттин уулдары – Сейид, Кадырбек, ошондой эле аларга кошулган Темирлан Султанбеков өткөн жылы жеңил ойго жетеленишип кайрымдуулук менен Атамбаевдин акчасын сапырып “шоу” уюштурушкан. Алар психиатриялык ооруканада жаткан балдарга жардам алып келишип, ал жердеги бейтаптар менен камерага кучакташып сүрөткө түшүп, же болбосо “саясий туткундарга” алыс эмес жерлерде өткөрүп берүү үчүн самса бышырышат.

Жергиликтүү кеңештерге шайлоодо 10 миллион 262 миң сом короткон “Кыргызстан социал-демократтары” шаардык кеңешке кирүү үчүн зарыл болгон 7% добуш топтой алышкан эмес. Кайра шайлоодо Бишкек шаардык кеңешине СД партиясы өтсө дагы парламенттик шайлоого Жогорку Кеңешке караандабай калды. Аламүдүн округунан Атамбаевдин биринчи жубайынан уулу Сейид Атамбаев алдыга чыкты.

Азизбек КЕЛДИБЕКОВ, NazarNews.kg