Парламенттик шайлоодогу бюллетендердин 18,36% кол менен саналып бүттү - бул 29-ноябрь, кечки саат 21:00гө карата маалымат. 

Борбордук шайлоо комиссиясынын (БШК) Маалыматтык системасы көрсөткөндөй, 2494 шайлоо тилкесинин 460ка жакынындагы бюллеттендер саналды. Ал эми электрондук үкөктөр 97% ашуун бюллетенди санап бүттү. 

28-ноябрда парламенттик шайлоодо добуш берүү соңуна чыккандан кийин БШКнын добуштарды санаган автоматташтырылган системасы иштебей калган. Болжол менен 40 мүнөттөн кийин кайра ишке киргенде добуштардын пайыздык көрсөткүчү өзгөрүп калган. 

Бир катар партиялар муну "көз боёмочулук" деп, шайлоо жыйынтыгын жокко чыгарууну талап кылышты. БШКнын төрайымы Нуржан Шайлдабекова серверден техникалык мүчүлүштүк кеткенин айтып, добуш саноого зыян болбогонун билдирген. 

Жогорку Кеңештин шайлоонун баштапкы жыйынтыгына ылайык, алты партия 5% пайыздык босогодон өтүп, шайлоодо утканы айтылууда. Акыркы жыйынтык бюллетендер кол менен саналып бүткөндө чыгат. 

Добуш берүүгө укуктуу 3 миллиондон ашуун жарандын ичинен шайлоого келгендер 30% тегерегинде болду. 

Булак: NazarNews.kg