Спикер Талант Мамытов баштаган Жогорку Кеңештин делегациясы Борбор Азия мамлекеттери менен ОФ парламенттер аралык алгачкы форумуна катышуу үчүн Түркмөнстандын борбор калаасы Ашхабад шаарына барган. Делегациянын курамында Жогорку Кеңештин төрагасынын орун басары Жамиля Исаева, депутаттар Миргүл Темирбаева, Алишер Козуев жана Максатбек Сарбагышев бар.Жогорку Кеңештин төрагасы Талант Мамытов Түркмөнстандагы иш сапарынын алкагында Орусия Федерациясынын жана Борбор Азия мамлекеттеринин парламент жетекчилери менен бирге Ашхабад шаарындагы Конституция монументине гүлчамбар койду. Иш сапардын алкагында бир катар сүйлөшүүлөр мерчемделип, анын ичинен төрага Мамытов Түркмөнстандын президенти Сердар Бердымухамедов, Милли Генгешинин Халк Маслахатынын төрагасы Гурбангулы Бердымухамедов жана Межлис төрайымы Гүлшат Маммедова менен жолугушары күтүлүүдө.

Талант Мамытов баштаган Жогорку Кеңештин шектүү курамы мурун Орусия Думасынын төрагасы Вячеслав Володин менен жолугушуп, дагы уят болушкан. «Силер АКШ, Европаны карайсыңар, бирок башыңарга мүшкүл түшкөндө Орусиядан жардам сурайсыңар...» деген мааниде кыкеңдерди каарып өткөн. Алгач Орусияга барганда экс-тышкы иштер министри Руслан Казакбаев кесиптеши Лавровдон кагуу жеп, «өз үйүңөрдө жүрөсүңөрбү?» дегендей кеп уккан. Себеби, журналист экөөнүн жолугушуусунда тыңсынып, кыргызча суроо бергени үчүн басмырланган эле. Төрага башка мамлекеттердин спикерлеринентил угуп жаткан соң өз милдетин кантип аткарып жатат? Аны коштоп баргандардын бары кайрадан депутат болуп алышты. Аны коштоп жүргөндөр деле жүрөк жылытпайт.. Гүлшат Асылбаева, Айсулуу Мамашова коммерсанттар болсо, Өмүрбек Бакиров айтылуу Алманбет Анапияевдин өкүл баласы. Айтор, ушул сыяктуу күмөндүүлөр Жогорку Кеңештин курамына жармашып алышып, Володиндин астында билмексен болуп отурушса, анан жарытылуу сөз угушмак беле? Эми алардын кээ бирөөнөн тазаланган.

Спикер Мамытов шайлоо алдында «Ата-Журт» партиясында болсо, эмнегедир ортону жел аралап «Ынтымак» партиясына кирген. «Эшегине жараша тушагы» дейт, заманга жараша спикер Талант Мамытов «иңа» деп бакырып, бул ааламга келген күндөн баштап, арамзачылыктын алиппесин үйрөнө баштаган. Бешиктен бели чыга элек жатып, «Ата-Журт» партиясында ар кимдин көлөкөсүн аңдып, эшигин сагаалай баштайт. «Ата-Журт» партиясынан жерден элдир-селдир жазганды үйрөнгөн соң, андан катта акаларынын «акырларын» аңдый баштайт. Анын «арзыматтык» аргамжысына алгач акалары чалынат. Ал жерден арамзачылыктын анатомиясын толук үйрөнгөн соң, тормозу жок токтолбой кете берет. Күндүн тең жарымында «Ата-Журт» партиясынын ишин бүтүрсө, күндүн экинчи жарымын «Республика» партиясынын оюнун ойноп «РАЖда» аты-жыты жок депутатка айланат. Эки «акырдан» жем жеп аткан учурда акеси байкоосуздан бийликке келип, Талант Мамытовдун жылдызы жарк этип жанып, Канат Исаевди омуроолоп спикерлик кызматты ээлейт.

Чимкириктердин  «чоң муштум» заманында чокчолоңдоп убайды ушул жигит көрдү. Ал Мыктыбек Абдылдаев менен Канат Исаевден кийин спикерликти алган. Эсирип кеткенде казак спикери  менен билгизбей стакан кагышып мыкты спикерге айлангысы келет. Казак спикери шапалактай Талант Мамытов эмес шайтанга да куйругун карматмак беле, шар эле экс-президент Назарбаев менен кете берди. Талант Мамытов элдин мүлкүнө көз артып «чимкирик» парламентти мыйзамсыз бир жыл жетектеди. Анткени булардын мөөнөтү 2020-жылы эле бүткөн. Эми сот депутаттыкка «жашыл жарык» күйгүзбөй баягы дардаңдаган Талант Мамытов жарылган шардай шалбырап, БШК «Ынтымак» партиясына талапкер катары илбей илең-салаң кылып жатканы спикерликти башка бирөө көздөп турганы эле. Болбосо спикерге БШК эмес, эч ким даап бара алмак эмес.   Эми ал кайсы кызмат болсо да илбериңки чуркап барары бышык. Административдик  сот БШКнын ал депутатка талапкер катары жарабай турганын Жогорку Сотко кассациялык арыз менен текшергиси келген. Кассациялык арызды караган Жогорку Сот мыйзамдын 254 беренеси менен иш жүргүзүп 2021-жылдын 12-февралында БШК берген ишеним каттын негизинде Талант Мамытовдун депутаттыкка талапкердигин жарамсыз деп баалады.  Бирок Талант Мамытовго айла жок экен. Депутат болбосо да «Уйга жүгөн салабы, үйрөнгөн адат калабы» дегендей күндүз Ак үй үчүн иштеп, түнкүсүн жамынып барып, башкалардын ишин бүтүрүп, мына кайрадан спикердикти ээлеген. Бийлигиңди деле урдум дейт турбайбызбы, спикердин кебетеси ушул болсо.

Азизбек КЕЛДИБЕКОВ, NazarNews.kg