Жалал-Абад облусунда шайлоо күнү миңден ашуун милиция кызматкерлери коомдук тартипти көзөмөлдөшөт. Бул тууралуу президенттин облустагы өкүлчүлүгунүн басма сөз кызматы билдирди.

Маалыматка ылайык, бүгүн 24-ноябрда Жалал-Абад шаарынын борбордук аянтында горнизондук саптык кароо өткөрүлдү.

Иш-чарага КР президентинин Жалал-Абад облусундагы ыйгарым укуктуу өкүлү Абсаттар Сыргабаев, Ички иштер министринин орун басары Нурбек Абдиев, Жалал-Абад ОИИБдин начальниги Ашим Тагаев катышты.

Облус башчысы горнизондук саптык кароодо Жалал-Абад облусунун бардык район-шаарларында тартип сакчыларына шайлоо өнөктүгүнө карата керектүү шарттар түзүлгөнүн билдирди.

Ошондой эле, Сыргабаев милиция кызматкерлери кылмыштуулуктун алдын алууда, коомдук коопсуздукту камсыздоодогу эмгеги чоң экенин белгилеп, ыраазычылык билдирди.

Белгилей кетсек, 28-ноябрда өтүүчү КР Жогорку кеңешинин депутаттарынын шайлоодо облустагы шайлоочулар 450дөн ашык участкада добуш бере алышат.

Булак: NazarNews.kg