Сөз эркиндиги – демократиянын тиреги

Журналист: АЙСУЛУУ ТАЛАНТ

07.11.2025, 21:36

13006

коом

Бүгүн Басма сөз күнү – журналисттердин кесиптик майрамы. Бул күн – коомго чындыкты жеткирүүнүн, эл үнүн бийликке угузуунун, маалыматтын калыстыгын сактоонун маанисин эске салган күн.

Журналист – жөн гана жаңылык таратуучу эмес, ал – коомдун күзгүсү, эл менен бийлик ортосундагы көпүрө. Ошондуктан сөз эркиндиги – бул жөн гана ураан эмес, демократиянын тиреги. Эгер журналист эркин болбосо, коом да эркин болбойт.

Акыркы жылдары Кыргызстанда сөз эркиндигинин айланасында ар түрдүү пикирлер айтылып келет. Бир жагынан социалдык медиа ар бир жаранга өз оюн айтууга мүмкүнчүлүк берди. Бул демократия үчүн чоң жетишкендик. Бирок, экинчи жагынан басма сөзгө, журналисттерге карата басым, соттук териштирүүлөр, «фейк маалымат» деген шылтоолор менен цензуранын жаңы формалары пайда болду.

Журналисттин милдети – фактыларга таянып, коомдук кызыкчылыкты көздөө. Бирок ошол эле учурда мамлекет да сын айткан үндү баспастан, ачык диалогго мүмкүнчүлүк түзүшү зарыл.

Бүгүнкү майрам – журналисттин эмгегин баалоо гана эмес, ошондой эле сөз эркиндигинин азыркы абалына көз чаптырып, аны коргоо үчүн бирге аракеттенүүгө чакырык. Анткени эркин сөз бар жерде – адилеттик, адилеттик бар жерде – ишеним болот.