Массалык башаламандыктар үчүн кармалган Темирлан Султанбеков үй камагына чыгарылды. Бул тууралуу Бишкек шаардык сотунун басма сөз кызматынан билдиришти. 

Эске салсак, 12-октябрь күнү Бишкектин Биринчи май райондук соту Султанбековду №1 тергөө абагына эки айга камоону чечкен.

Жаш саясатчы кармоо учурунда сабалганын жана кыйноого кабылганын 12-октябрда Кыйноого каршы улуттук борбордун мүчөлөрү менен жолугушууда билдирген.

Султанбеков бошотулушу керек экенин бир топ саясатчылар айтып чыгышкан жана бул суроо жаңы шайланган өкмөт башчыга да, парламент спикерине да берилген. 

Султанбековдун адвокаты Чынара Жакупбекова: «Үй камагына чыкты. Азыр чечимди алып, милициянын убактылуу кармоочу жайынан чыгарып келебиз. Мыйзам боюнча, мөөнөтү 10-декабрга чейин болуш керек» деди. 

Булак: NazarNews.kg