Кыргыз Республикасы менен Тажикстандын айырмасы, демократиялуу бизге салыштырмалуу Тажикстанда авторитардык бийлик орногон. Ар бир иш канчалаган жылдан бери мамлекет башында турган Эмомали Рахмондун каш-кирпиги менен чечилет. Эгер ал парламенттин депутаттарына оор кырдаалдар түзүлгөн жерге барып келгиле десе, биринен-бири калбай жарышкан бойдон жөнөшмөк.

Кыргызстан болсо демократиялуу мамлекет. Чек арада кан күйүп оор кырдаалдар түзүлүп жатканда парламент депутаттарынын жатып алышы туура эмес. Ошондуктан, оор ахыбал тартып жаткан элге Жогорку Кеңештин депутаттары Төрөбай Зулпукаров, Талант Мамытов, Мирлан Бакиров жана Таабалды Тиллаев Баткенге учуп кетишти.

Баткен облусунда, Кыргызстан менен Тажикстан чектешкен аймактарда эки күндөн бери кырдаал абдан чыңалган бойдон турат. Мамлекеттик чек ара кызматы 16-сентябрда Лейлек районундагы Максат айылындагы чек ара бекетинде ок атышуудан Кыргызстандын бир чек арачысы каза болгонун билдирди. Учурда абалды жөнгө салуу боюнча эки өлкөнүн чек ара өкүлдөрү сүйлөшүү өткөрүүдө. Жаңжалдын чыгышына чек арага жакын жердеги такталбаган аймакка тажик жарандары курулуш иштерин баштаганы себеп болгон. 16-сентябрдын кечинде, Лейлек районундагы Максат айылына жакын жерде, кыргыз-тажик чек арасындагы атышта курман болгон “Бөрү” атайын тобунун кызматкери, прапорщик Равшан Муминов курман болгон.

Азизбек КЕЛДИБЕКОВ, NazarNews.kg