Бүгүнкү күндө «Бишкек Арена» стадионунун курулуш иштери дээрлик 90 пайызга аяктап калды. Бул объект Борбор Азиядагы эң ири стадиондордун бири болуп саналат. Бул тууралуу президенттин иш башкармалыгынын башчысы Каныбек Туманбаев билдирди.

Айтымында, мындай масштабдагы спорттук комплексти туруктуу негизде тейлөө жана кармоо олуттуу каржылык чыгымдарды талап кылат. 

"Ушуга байланыштуу, Кыргыз Республикасынын Президентинин тапшырмасынын негизинде стадиондун аймагында «Bishkek Arena Mall» заманбап соода борбору курулууда. Бул соода борбору стадиондун инфраструктурасын өнүктүрүүгө гана эмес, келечекте объекттин үзгүлтүксүз иштешин камсыздоого да кызмат кылат.

Белгилей кетсек, соода борборунан түшкөн каражаттар «Бишкек Арена» стадионун кармоого, тейлөөгө жана анын инфраструктурасын жакшыртууга багытталат. Бул өз кезегинде мамлекеттик бюджетке кошумча жүк түшүрбөстөн, объекттин өз алдынча туруктуу иштөөсүнө шарт түзөт.

Ошондой эле соода борборунун жайгашкан жери абдан ыңгайлуу жана келечектүү локация болуп саналат. Бүгүнкү күндө шаардагы көпчүлүк соода борборлорунда унаа токтотуучу жайлардын жетишсиздиги негизги көйгөйлөрдүн бири болуп келет. «Bishkek Arena Mall» долбоорунда бул маселе алдын ала эске алынып, келген жарандар жана ижарачылар үчүн жетиштүү сандагы кеңири жана ыңгайлуу унаа токтотуучу жайы каралган. Бул соода борборунун негизги артыкчылыктарынын бири болот", - деди Туманбаев.