МЕХИКО, 13-авг. — РИА Новости. Венесуэланын өкмөтү менен оппозиция өкүлдөрү Англия банкында сакталган өлкөнүн резервдик активдерин Венесуэлага кайтаруу үчүн биргелешип аракеттенүүгө макулдашты. Бул тууралуу тараптардын сүйлөшүүлөрүнүн биринчи айлампасынын жыйынтыгында кабыл алынган биргелешкен коммюникеде айтылат.

«Эки тарап тең Венесуэланын Англия банкындагы эл аралык резервдик активдерин өлкөгө кайтарууга көмөктөшүүгө күч-аракет жумшайт. Ошондой эле аларды натыйжалуу пайдалануунун ачыктыгын камсыз кылуу, каражаттардын пайдаланылышын көзөмөлдөө жана аудит жүргүзүү механизмдери түзүлөт. Бул чаралар жабыркагандардын жыргалчылыгын камсыз кылууга багытталат», — деп айтылат документте.

Тараптар бул келишимди 24-июнда Венесуэлада болгон эки ирет жер титирөөдөн жабыркагандарга жардам көрсөтүүнү улантуу зарылдыгы менен байланыштырышты. Алар турак жай менен камсыз кылуу, электр энергиясын калыбына келтирүү, саламаттыкты сактоо жана урандыларды тазалоо боюнча жардам программаларын күчөтүүнү пландап жатышат.

Мындан тышкары, тараптар сот системасын реформалоо процессин баштоого макулдашты. Анын алкагында Жогорку сот тууралуу органикалык мыйзамга жана бул тармактагы башка мыйзамдарга өзгөртүүлөр киргизилет.

Ошондой эле сот кызматтарына талапкерлерди көрсөтүү боюнча комитеттин курамы жаңыланып, кеңейтилет. Жогорку соттун бардык судьяларын тандоо жана дайындоо боюнча жаңы жол-жобо иштелип чыгат.

Коммюникеге ылайык, жетишилген макулдашууларды ишке ашыруу август айында эле башталышы керек. Бул үчүн тараптар кабыл алган милдеттенмелердин аткарылышын камсыз кылган туруктуу иштөө механизми түзүлөт.