Эл аралык жана геосаясий изилдөөлөр борборунун директору, саясат таануучу Бакытбек Жумагулов: Бириккен улуттардын Жалпы ассамблеясынын алкагында АКШ президенти менен борбор азиялык 5 президенттин «5+1» форматындагы жолугушуусу – Борбор Азия үчүн кайрадан жанданып жаткан жаңы «Чоң оюндан» кабар берет. Биринчи «Чоң оюн» XIX кылымда Орусия менен Улуу Британия ортосунда болгон, эми болсо Улуу Британиянын тарабында АКШ дагы ойноп жатат.

Азыркы абалдын татаалдыгы – XIX кылымда Кытай ал оюндун объекти болсо, азыр ал – субъект, дагы бир өз алдынча оюнчу. Америка менен «5+1» жолугушуусу эмдиги жылы Борбор Азиянын бир жумуриятында өткөрүлмөй болду жана ага – АКШдагы президенттик шайлоо алдында Джо Байден дагы келиши мүмкүн. Быйыл октябрда Кыргызстанга Орусия президенти Путиндин келишин дагы ошол «Чоң оюндун» бир бөлүгү деп эсептесе болот...