2026-жылдын 23-январында Кыргыз Республикасынын Ички иштер министрлигинин жыйындар залында ички иштер органдарынын 2025-жылдагы ыкчам-кызматтык ишмердүүлүгүнүн жыйынтыгын чыгарууга арналган коллегиялык отурум өттү. Бул тууралуу аталган министрликтин басма сөз кызматы билдирди. 

Иш-чарага Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Адылбек Касымалиев, ички иштер министри, милициянын генерал-лейтенанты Улан Ниязбеков, ИИМдин жетекчилик курамы жана ички иштер органдарынын башчылары катышты.

Коллегиялык отурумда ички иштер министри Улан Ниязбеков ички иштер органдарында санариптештирүү системалуу түрдө жүргүзүлүп жатканын, ал эми видеокөзөмөл тутумдары коомдук тартипти жана жарандардын коопсуздугун камсыздоого багытталганын белгиледи.

Ошондой эле Президент Садыр Жапаровдун тапшырмасынын негизинде “Коопсуз өлкө” долбоору 2026-жылдын аягына чейин толук ишке ашырылары, анын алкагында өлкө боюнча 20 миң видеокамера орнотуу пландалганы айтылды.

Коллегиянын жүрүшүндө “Коопсуз өлкө” долбоорунун бир жылдык иш-мерчеми бекитилип, аны кынтыксыз аткаруу боюнча жетекчилерге тапшырмалар берилди.

Андан сырткары, ички иштер органдарынын башчыларынын алдына  милицияга кайрылган ар бир жаранга мыйзам чегинде жоопторду берип, укуктарын жана милдеттерин так түшүндүрүп, сапаттуу сервистик тейлөө жумуштарын күчөтүү талабы коюлду. Ушуга эле катар, элди кабыл алууну белгиленген тартипте ишке ашырып, ар бир жарандын маселесин кунт коюп угуп, жеринде ыкчам чечүү  зарылдыгы айтылды. 

ИИМдин жетекчилиги  тарабынан коррупцияга каршы күрөштү күчөтүү, өздүк курам арасында күн сайын түшүндүрүү иштерин жүргүзүү, ошондой эле киберкоопсуздукка, интернет алдамчылыгына жана санариптик коркунучтарга каршы чараларды бекемдөө зарылдыгы белгиленди.

Коллегиялык отурумдун аягында жетекчилердин алдында кылмыштуулуктун алдын алуу, жарандардын коопсуздугун камсыздоо, жол коопсуздугу, жашы жете электерге жана үй-бүлөлүк зомбулукка байланышкан кылмыштарды болтурбоо, ошондой эле өздүк курам арасындагы кызматтык тартипти бекемдөө боюнча негизги тапшырмалар коюлду.

https://www.facebook.com/reel/883730231041020