Февралдын аягынан бери Луганскидеги Первомайск шаарынын отузга чукул жашоочусу украиналык аскерлердин аткылоосунан жабыркады. Бул тууралуу аталган калаанын башчысы Сергей Колягинге таянып РИА Новости кабарлады.

Мурдараак мэр аталган агенттикке украиналык аскерлердин дайыма аткылап турганын жана аймактын суу блокадасында калгандыгын билдирген эле.

"Бүгүн эртең мененки күнгө чейинки сандарды айтсам (19-май – ред.), Первомайск шаарынын жана анын административдик башкаруусунда турган калктуу жайлардын 32 тургуну жарадар болду", — деген Колягин.

Ал шаршемби күнү украина тараптын артиллериялык аткылоолорунан үч жай жаран жаракат алгандыгын билдирген.

Мэрдин аткылоо туурасында айтып бергени жана жаракат алган кишинин видеосу РИА Новостинин telegram-каналына жарыяланды.

Колягин февралдын аягынан тарта Первомайскинин инфраструктурасынын 1,1 миңден ашуун объектиси каршылаш тараптын аткылоосуна учурагандыгын кошумчалаган.

"Шаардын инфраструктурасын билип туруп эле атайылап талкалоо жүрүп жатат. Алар турак жай фонду, социалдык тармак. Бүгүнкү күнгө алып эсептегенде 1150 объект зыян тартты. Алар — 750 турак жай фонду жана шаардыктардын жашоосуна зарыл болгон шарттар менен камсыздай турган социалдык объектилер", — деген Колягин.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

 Булак: NazarNews.kg