Улуу Британиянын Мариуполдогу аскердик аракеттерге Украина тараптан катышып, колго түшкөн эки жараны мурда Сирияда (Британ армиясынын катарында эмес) согушкан. Бул тууралуу РИА Новости Украина күчтөрүнүн деңиз аскер батальонундагы десанттык-штурмалоочу взводунун өз ыктыяры менен куралын тапшырып берген командири Сергей Старчукка шилтеме кылып жазды.

"Мен батальондо ротага келген учурда алар (британиялыктар — ред.) кызмат өтөп жүрүшүптүр. 2019-жылдын аягында рота командири аларды менин взводума которууну чечти, себеби мен англис тилин бир аз билчүмүн... Алар кадимки эле матростордой келишим түздү", — деди Старчук.

Анын айтымында, Эйден Аслиндин согуштук тажрыйбасы бир топ эле болчу.

"Сирияда согушканын айтып калчу. Ким тарапта болгондугун билбейм, бирок Улуу Британиянын аймагына кайтып барууга болбойт деген. Себеби ал аталган мамлекеттин куралдуу күчтөрүнүн катарында эмес экен. Ал эми мындай нерсе аларда экстремизмби же террорчулукпу, кандай эсептелерин билбейт экенмин. Шон Пиннер да Сирияда болуптур, аныкы да ушундай эле абал. Эгерде алардын келишими аягына чыгып, Украина жарандыгын алса, балким, украиндик катары кайтып барышы мүмкүн", — деген Старчук.

Британиялык Шон Пиннер менен Эйден Аслин Украинада апрелдин ортосунда колго түшкөн.

"Украинага келген жалданма аскерлер комбатанттар экен, аларды узак мөөнөткө созулган абак күтөт", — деген РФтин расмий өкүлү, генерал-майор Игорь Конашенков.

Ал эл аралык жалданма аскерлер эл аралык гуманитардык укук боюнча "комбатант" статусун албагандыгын белгилеген. Кийинчерээк Пиннер "Россия 1" телеканалынын эфиринде ал жана Аслин премьер-министр Борис Жонсонго аларды Украинадагы оппозициячыл Виктор Медведчукка алмашуусуна көмөк көрсөтүүнү суранып, кайрылган.

Орусия Украинадагы атайын операциясын 2022-жылдын 24-февралында баштаган. Президент Владимир Путин ал "Киев режими тарабынан сегиз жыл бою кордолуп-мазакталып, геноцидге кабылгандарды коргоо" максатын көздөйт деген. Өлкө башчынын айтымында, Донбасстагы "тынч жашоочуларга жасаган кандуу кылмыштары" үчүн "Украинаны демилитаризация жана денацификациялап", аскер кылмышкерлерин сотко бериш керек.

РФтин Коргоо министрлиги билдирүү жасап, Куралдуу күчтөр соккуну аскердик инфраструктура жана аскердик күчтөргө уруп жаткандыгын, 25-мартта негизги тапшырманын биринчи этабын аткаргандыгын, тагыраагы, Украинанын согуштук мүмкүнчүлүгүн азайткандыгын билдирген. Алар башкы максат Донбассты бошотуу экендигин айтышкан эле.