Вильнюстагы НАТОнун саммитине катышкан америкалык аткаминерлер Украинанын президенти Владимир Зеленскийдин Твиттердеги билдирүүсүнө нааразы болушту. Бул тууралуу кечээ, 11-июлда "Вашингтон пост" гезити жазып чыкты.

Литванын баш калаасында НАТОнун саммитинин биринчи иш күнүнөн кийин НАТОнун баш катчысы Йенс Столтенберг жыйынтыктоочу билдирүүсүн жарыялады. Анын айтымында, саммиттин катышуучулары Украинадан НАТОго мүчө болуу боюнча иш-аракеттер планын аткарууну талап кылбоо чечимине келишти, ошондой эле өлкөгө көп жылдык аскердик жардам көрсөтүү программасын бекитишти.

НАТО өлкөлөрү Киевди альянска “бардык шарттар аткарылганда” чакырууга убада беришкен, бирок ага чейин Украинадагы согуш токтошу керек. Андан кийин Зеленский НАТО Вильнюстагы саммитте Киевди альянска чакыруунун акыркы мөөнөтү боюнча конкреттүү чечимдерди кабыл алгысы келбей жатканына нааразылыгын билдирди. Ал Украина сый-урматка татыктуу экенин айтып, өнөктөштөрдүн “белгисиздигин” алсыздык деп эсептейт.

Америкалык делегациянын мүчөлөрү Зеленскийдин твиттерине нааразы болгону кабарланган. Украин лидеринин Твиттердеги комментарийлери Украинанын альянстагы тарапкерлеринин көңүлүн калтырды, алар муну Киевдин жеңиши деп эсептешти.

НАТОнун бир катар өлкөлөрүнүн дипломаттары Зеленский Твиттерди сүйлөшүү куралы катары колдонгонун айтышты. Бул жол менен Украинанын лидери альянска максималдуу басым жасоого аракет кылды.

Маалымат үчүн айта кетсек, бүгүн, 12-июлда НАТОнун саммитинин экинчи күнү уланууда. Анын алкагында Зеленский бир катар өлкөнүн лидерлери менен жолугушууларды өткөрүүдө.

Алибек Бейжанов, Ташкент

Булак: NazarNews.kg