Жаш депутат Жанар Акаев салык кызматына кирешеси жана киреше булактары тууралуу толук маалымат бербей, буйтап жүрөт дешет билгендер.

Айтсак, ал өзүн буга чейинки декларациясында автоунаасы, турак-жайы, деги эле эч нерсеси жок, көчөдөгү селсаяктай болуп көрсөткүсү келген деп күбүр-шыбыр кылышууда салыкчылар.

Муну менен Акаев эмнени жашырып жүрөт болду экен? Билгендер анын соода менен алектенген компаниясы бар деп жүрүшөт. Ал ишкана 2014-жылы юстиция министрлигинен каттоодон өткөн, бирок ушуга чейин салык түрүндө мамлекеттик бюджетке "кокон тыйын" которгон эмес.

Белгилей кетсек, бул депутат 2015-жылы парламентке шайланып келген, ошондон кийин ал коммерциялык ишмердүүлүгүн токтотушу керек болчу. Тагыраагы ага чейин эле, себеби депутаттыкка чейин ал президенттин маалымат-катчысы болуп эмгектенген. 

Булак: NazarNews.kg