Жогорку сот Аскат Жетигенди абакта калтырды

Журналист: АЙСУЛУУ ТАЛАНТ

18.03.2025, 15:28

21601

коом

Бүгүн, 18-мартта акын Аскат Жетигендин адвокаттарынын кассациялык арызы Жогорку сотто каралып, ал камакта калтырылды.

13-март күнү адвокаттар толук экспертиза жүрбөгөндүгүн айтып, Аскат Жетигенди актоону суранган. Отурум бүгүнкүгө жылган.

Бишкектин Свердлов райондук сотунун судьясы Жолдошбек Сулайманов Аскат Жетигендин иши боюнча былтыр 1-июлда чечим чыгарган. Судья аны Кылмыш-жаза кодексинин 327-беренеси (“Бийликти басып алууга чакырык жасоо”) менен “күнөөлүү” деп таап, үч жылга эркиндигинен ажыраткан. 278-беренесинин 3-бөлүгү (“Массалык башаламандыктарга чакыруу”) боюнча актаган.

Бишкек шаар соту 17-октябрда райондук соттун чечимин күчүндө калтырган.

УКМК Аскат Жетигенди алгач 16-мартта Кочкор районунан кармап, Бишкек шаарына алып келген. Коомдо анын кармалышы катуу талкууланып, бошотуу талабы коюлган. 18-мартта Бишкектин Биринчи май райондук соту аны эч жакка чыкпоо тилкаты менен бошоткон. 20-мартта УКМК Аскат Жетигенге дагы бир иш козгогон. Ушул эле күнү Биринчи май райондук соту аны Бишкектеги №1 тергөө абагына камакка алган.