Россия, АКШ жана Украинанын делегацияларынын Абу-Дабиде өткөн сүйлөшүүлөрү жемиштүү болду, тараптар аларды ишемби күнү улантат. Бул тууралуу Ак үй билдирди. Делегациялар коопсуздук маселелерин, буфердик зонаны жана көзөмөл механизмдерин талкуулашты. Сүйлөшүүлөр жабык форматта, маалымат каражаттарынын катышуусуз өттү.

Россия, АКШ жана Украинанын делегацияларынын үч тараптуу жолугушуусу конфликтти тынчтык жолу менен чечүү маселесине арналды жана ал жемиштүү болду. Сүйлөшүүлөр ишемби күнү, 24-январда улантылат. Бул тууралуу NBC жана «Суспільне» Ак үйдүн өкүлүнө шилтеме берүү менен кабарлашты.

CNN жана Reuters да сүйлөшүүлөрдүн биринчи күнү аяктаганын ырасташты.

ТАСС агенттигинин булагынын айтымында, тараптар ишемби күнү да байланышты улантууга макул болушту, «эч ким эшикти тарс жаап кеткен жок». Мамлекеттик агенттиктин маалыматына караганда, делегациялар аралык жыйынтыктарды өз борборлоруна билдиришет.

Коопсуздук маселелерине арналган жолугушуунун алгачкы раунддары мүмкүн болушунча жабык режимде өткөн. ТАССтын булагы билдиргендей, журналисттерди чакырбоо жана сүйлөшүүлөрдүн так жайгашкан жерин ачыктабоо чечими кабыл алынган.

Сүйлөшүүлөрдүн башталганын БАЭнин Тышкы иштер министрлиги Москва убактысы боюнча болжол менен саат 18:30да жарыялады. Украинанын президенти Владимир Зеленскийдин командасы делегациялар топторго бөлүнүп, ар кандай форматта сүйлөшүүлөрдү жүргүзгөнүн билдирди.

«Кээде катышуучулар өзүнчө талкуулар үчүн бөлүнүп кетишет, кээде баары чогуу жолугат, айрым учурда темалар боюнча бир нече топко бөлүнүшөт», — деп айтышты алар.

Негизги тема катары Зеленский өзү аймактык маселени атады. ТАССтын маалыматына ылайык, талкууланган темалардын арасында буфердик зона жана көзөмөл механизмдери болгон.

Буфердик зона — бир аймакты экинчисинен бөлүп турган атайын түзүлгөн тилке. Эл аралык мамилелерде ал негизинен конфликт тараптарынын ортосундагы чыңалууну азайтуу жана түз кагылышуулар тобокелдигин төмөндөтүү үчүн колдонулат.

Абу-Дабидеги үч тараптуу сүйлөшүүлөр Россия, Украина жана АКШ президенттеринин жолугушуусуна алып келиши мүмкүнбү деген суроого АКШнын президенти Дональд Трамп «ар кандай жолугушуу — бул жакшы» деп жооп берип, эгер жолугушуу болбой калса, «эч нерсе болбойт» деп кошумчалады. Ак үйдүн башчысынын айтымында, ал Москва тарабынан айрым жеңилдиктерди күтүп жатат.

Буга чейин Трамп Украинадагы конфликт «жетишерлик жакын убакытта» жөнгө салынат деп үмүттөнөрүн жана келишим түзүүгө Россиянын да, Украинанын да президенттери кызыкдар экенин билдирген.

Абу-Дабидеги сүйлөшүүлөргө чейин Россиянын президенти Владимир Путин АКШнын делегациясы менен жолуккан. Бул жолугушуу Вашингтондун Киев жана Европа өлкөлөрү менен болгон байланыштары тууралуу маалымат алуу, ошондой эле кийинки аракеттердин параметрлерин биргелешип аныктоо маселелерине арналган.