Кошмо Штаттар Бириккен Улуттар Уюмунун Коопсуздук Кеңешинин Газада тез арада гуманитардык ок ​​атышууну токтотууну талап кылган резолюция долбооруна кайрадан вето койду. Бул тууралуу эл аралык уюмдун расмий баракчасында жарыяланды.

Кечээ, 20-февралда Бириккен Улуттар Уюмунун Коопсуздук Кеңеши Алжир тарабынан сунушталган Газада ок атышууну токтоосуз токтотууну талап кылган, карапайым элге жасалган бардык кол салууларды айыптаган жана мажбурлап көчүрүүгө каршы чыккан резолюция долбоорун добушка койду.

БУУнун Коопсуздук Кеңешинин 15 мүчөсүнөн Улуу Британия калыс калды, АКШ вето койду, 13 өлкө резолюцияга макул болду.

АКШнын БУУдагы элчиси Линда Томас-Гринфилд добуш берүү алдында билдирүү жасап, АКШнын туткундарды бошотуу боюнча Израил, Хамас, Египет жана Катар менен сүйлөшүүлөрдү жүргүзүп жатканын эске салды. Ал макулдашууга жетишилсе, 6 жумалык тыныгуу жарыяланарын билдирди.

Дипломатия убакытты талап кылат, деп белгиледи Гринфилд жана жер-жерлердеги чындыктарды көз жаздымда калтырууга болбойт. Ал эми Алжирдин резолюция долбоору сүйлөшүүлөргө терс таасирин тийгизет.

Алжирдин БУУдагы туруктуу өкүлү Амар Бенжама добуш берүүгө чейин резолюцияга каршы чыкпоого чакырды.

«Резолюциянын долбооруна каршы чыгуу Палестина элине каршы ырайымсыз зомбулукту жана жамааттык жазалоону колдоо болуп саналат. Ар бир палестиналык өлүмдүн жана геноциддин бутасы. Кеңеш ок атышууну токтотууга чакырганга чейин дагы канча бейкүнөө адамдардын өмүрү кыйылышы керек?» — дейт Алжирдин екулу.

Орусиянын БУУдагы туруктуу өкүлү Василий Небензя өлкөсүнүн 2023-жылдын 16-октябрында ок атышууну токтотууга чакырганын, бирок ал кабыл алынбаганын эске салды.

«Аракетсиздиктин баасы 28 миңден ашык жабырлануучуну түзөт. Бул үчүн жалпы жоопкерчилик БУУнун Коопсуздук Кеңешине кирген батыш өлкөлөрүнө жүктөлөт», - деди Орусиянын өкүлү.

Маалымат үчүн айта кетсек, АКШ БУУнун Коопсуздук Кеңешинин 2023-жылдын 16, 18 жана 25-октябрында жана 8-декабрында Газа боюнча кабыл алган резолюцияларына вето койгон. Ошондой эле 2023-жылдын 13-декабрында Бириккен Улуттар Уюмунун Башкы ассамблеясында 153 өлкөнүн макулдугу менен Газада тез арада гуманитардык ок ​​атышууну токтотууну талап кылган резолюция долбоорунун кабыл алынышына каршы чыккан 10 өлкөнүн бири АКШ болду.

Булак: NazarNews.kg