АКШнын президенти Дональд Трамп Владимир Зеленскийди Вашингтондо кабыл алгысы келген жок, бирок Франциянын президенти Эммануэль Макрондун көндүрүүсүнөн кийин оюн өзгөрттү. Бул тууралуу BFMTV каналына таянып ТАСС билдирди.

"Кечээ Зеленский Вашингтонго келмек болгон, бирок Трамптын администрациясынан бирөө: "Ук, Владимир, учак жалдагандан эч кандай пайда жок, келбе, бардык жолугушуулар жокко чыгарылды, президент Трамп сени кабыл албайт. Бул Киевде паника жаратты", — деген телеканалдын журналисти Патрик Сос.

Андан кийин, анын айтымында, Зеленский Макронго телефон чалып, Вашингтондо Украинадагы минералдар боюнча келишимге кол коюуга үмүт артып жаткан Трампты пикирин өзгөртүүгө көндүрүүнү суранган. Анын үстүнө, анын ою боюнча, бул визит «күчтүү символикалык мааниге ээ болмок». Ал эми француз дипломатиялык булагынын маалыматына караганда, ушундан кийин француз президенти Ак үйдүн ээсине телефон чалып, Зеленскийди кабыл алууга көндүрүп, ага кепилдик берген.

Эске сала кетсек, 26-февралда Трамп Зеленский ушул аптанын жума күнү Вашингтондо болорун, ал жерде украиналык минералдар боюнча келишимге кол кое турганын ырастаган эле. Буга чейин ал 28-февралда боло турган жолугушуу датасын айткан. Ошол эле учурда 26-февралда Ак үйдүн атын атагысы келбеген өкүлү Рейтер агенттигине Вашингтонго Зеленскийдин минералдык келишимге кол койбосо келген сапарынын мааниси жок экенин айткан.