АКШнын баасы туруктуу – Орусия Украинанын тегерегиндеги кырдаалды курчутуу боюнча чечимге келе элек, деп билдирди АКШ президентинин улуттук коопсуздук боюнча жардамчысы Жейк Салливан.

«АКШ өкмөтүнүн азыркы баасына ылайык, ал (Орусия президенти - ред.) азырынча чечим кабыл ала элек. Өткөн аптадан бери бул боюнча эч нерсе өзгөргөн жок», - деди Салливан Эл аралык мамилелер кеңешинде сүйлөп жатып.

Чалгындоо маалыматтары орус өкмөтү мындай мүмкүнчүлүктөрдү олуттуу карап жатканын көрсөтүп турат, деди ал.

Президенттин жардамчысы «биз бир дагы дүйнөлүк лидердин башына кирип чыга албайбыз, биз билген же билбеген нерселерге дайыма чектөөлөр бар» деп кошумчалады.

Орусия Батыштын жана Украинанын «агрессивдүү аракеттери» боюнча айыптоолорун бир нече жолу четке кагып, эч кимди коркутпай турганын жана эч кимге кол салууга ниети жок экенин, ал эми «орус агрессиясы» жөнүндөгү билдирүүлөр НАТОнун аскерий техникасын жакын жерде жайгаштыруу үчүн шылтоо катары колдонулуп жатканын айтып келген.

Орусиянын Тышкы иштер министрлиги мурдараак белгилегендей, Батыштын «орус агрессиясы» жана Киевге андан коргонууга жардам берүү мүмкүнчүлүгү тууралуу билдирүүлөрү күлкүлүү жана кооптуу.

Ошол эле маалда Киев жана Батыш мамлекеттери жакында Орусиянын Украинанын чек арасына жакын жерде «агрессивдүү аракеттеринин» күчөшүнө тынчсыздануусун билдиришкен.

Орус президентинин басма сөз катчысы Дмитрий Песков Орусия аскерлерин өз аймагынын ичинде жана өз каалоосу боюнча жылдырып жатканын билдирди. Анын айтымында, бул эч кимге коркунуч жаратпайт жана эч кимди тынчсыздандырбашы керек.

Булак: NazarNews.kg