Министрлер кабинетинин төрагасы Акылбек Жапаров Кыргызстанда чакан атомдук электростанция куруу идеясын колдойт.

Ал учурда мамлекет нанотехнология жана альтернативдүү энергия булактары боюнча жаңы доорго өткөнүн айтты.

"Кытай 100дөй АЭС курганы жатат. Беларусь куруп бүтүп, Өзбекстан жаңыдан баштады, ал эми Россияда ал бар. Коңшу Казакстан дагы өз аймагына атом электростанциясын курууга ниеттенүүдө. Бул бир күндүк иш эмес, толук циклге 100 жылга чейин убакыт кетет. Коңшулар сыяктуу ири станцияларды курбасак дагы, чаканы тууралуу ойлонушубуз керек. Бүгүн болбосо эртең дүйнө жүзүнө мындай станциялар кеңири таркайт. Андыктан окумуштуулар менен инженерлер кам көрө башташы керек", — деди Жапаров.

Кыргызстан чакан АЭС курууну караштырууда. Бирок анын жайгаша турчу жери аныктала элек. Энергетика министрлиги бул боюнча Россиянын "Росатом" мамлекеттик корпорациясы менен меморандум түзгөн.

Анда тараптар РИТМ-200Н реактордук орнотмосунун базасында атомдук электр станциясын (АЭС) курууга кызыкдар экени айтылган. Ошондой эле меморандумда Кыргызстанда өзөктүк инфраструктураны өнүктүрүү жана атомдук энергияны тынчтык максатта пайдалануу боюнча илимий-техникалык персоналдын квалификациясын жогорулатуу маселелери каралган.

"Росатом" мекемесинин башкы директору Алексей Лихачев Кыргызстанда АЭС сыяктуу объектинин болушу өлкөнү электр энергиясы жагынан гана көз карандысыз кылбастан, бүткүл Борбор Азия чөлкөмүндө илимий долбоорлордун көбөйүшүнө өбөлгө түзөт деген оюн билдирген.

Булак: NazarNews.kg