Ашхабадда массалык мушташ болду

Журналист: NAZARNEWS

12.05.2017, 4:50

19877

коом

Өткөн аптанын соңунда Ашхабадда массалык мушташ болду. Мир кичи районундагы мушташты Хитровка деген аталыш менен белгилүү кичи райондон келген 100гө жакын киши баштаган. Бул тууралуу «Азаттыктын» түркмөн кызматы кабарлады.

Мир кичи районунун тургундарынын бири кол салган адамдардын көбү 16-25 жаштагы адамдар болгонун билдирди. Айтымында, көбү мас же маңзат чегип алышкан.

Ал кичи райондун качып кетүүгө үлгүрбөй калган тургундары токмок жешкенин айтты. «Алар алдынан чыккандардын бардыгын сабап, жыгылып калгандарды тепкилешти. Андан тышкары короолордо турган автоунааларды да жөн коюшкан жок. Ондогон машиналарды талкалап кетишти», - деди ал.

Маалыматтарга караганда, мушташ жарым саатка созулган. Полиция менен тез жардам кызматы кол салган адамдар таркап кеткенден кийин келген. Азырынча жабыркаган адамдардын саны, окуянын келип чыгуу себептери белгисиз бойдон калууда.

Окуя боюнча укук коргоо органдары эч кандай комментарий бере элек.

Булак: "centralasian.org"