Акыркы убактарда коронавирус күч алып чүчкүргөнгө да айыппул, тамак-ичкенге да айыппул салына баштады. Мурун парламенттин депутаттары түкүргөнгө да айыппул салышкан. Ушул парламентке Аскар Салымбеков «Бүтүн Кыргызстан» партиясынын лидери Адахан Мадумаров экөө «Бүтүн Кыргызстан Эмгек» менен аттанган. Ал кезде Чуңкурчак жайлоосуна өзүнө тиешелүү партиянын лидерлери менен кеп-кеңешке келген «мамлекеттик шопур» катары мамлекеттин рулун көздөп турган Икрам Илмиянов баш ийбеген партиялардын барын балжа –булжа кылган. Ошолордун арасында «Бүтүн Кыргызстан Эмгек» бир аз добуш менен парламентке жетпей калган. Шайлоо алдында Түркиядагы үлкөн кызматын таштап келген Адахан Мадумаров азыркы шайлоо алдында даваатчыларды жер кыдырсын деп, коронавирус деген Кыргызстанда жок деп айгай сала баштады. Коронавирус Кытайдан башталган кезде Аскар Салымбеков гуманитардык жардам иретинде 50 миң маска берген. Кыргыз элинен кантип аясын, балким эмне жардам бергенин билгендер айтып коюшар. Коронавируска каршы гуманитардык жардамдарды берип жаткан «Эмгек» партиясы менен коронавирус бар экенин танган «Бүтүн Кыргызстан» партиясы экөөнүн позициясы бир эмес экени билине баштады. Эми парламенттик шайлоо кайрадан эшик-тешикти шыкаалай баштады. «Эмгек» партиясы кайсы партия менен шайлоого аттанат? Анткени, жалгыз «Эмгек» партиясы парламенттик шайлоого аттанганда азырынча 9 пайыздык тосмо бар, мейли ал 7 пайызга түшсүн. Бирок, өткөн шайлоодо добуштардын «даамын» сезип калган Аскар Салымбеков «Эмгек» партиясы менен кайсы партия менен биригер экендиги кызык. Балким, жаңыдан кубат алып жаткан «Биримдик» партиясы менен биригер. Эмнеси болсо да убакыт улам таарып баратат. Аскар Салымбеков бизнеске гана аскар тоо болбой, качан парламентке барып, элине аскар тоо болор экен?

Азизбек КЕЛДИБЕКОВ, NazarNews.kg