Коррупия менен күрөшүп жатабыз деген бийлик эки жылдык убактысын Атамбаевге коротту. Эми анын камалганына бир ай толду. Эл бийликтен 11 миң пенсия, 26 миң айлык акыны талап кыла баштады. Ага кошумча өнүгүүнү, өсүүнү талап кылышууда.

Мындан улам, өкмөт башчы Мукамбеткалый Абылгазиевдин дарегине айтылган сындар күч алып, ал кишинин да айласы кете баштады. Ары тартса араба сынат, бери тартса өгүз өлчүдөй эле кырдаал жаралды. Кылычын сунуп кыш да кирип келе жатат. Суу сактагычтарда ахыбал жакшы эмес. Малдын тоюту асмандын башы болду. Бюджет жыртык. Бизнес-мендер салыкты бир жыл мурда алдын ала төгүп берип жатышкандарын айтып ыйлактап башташты. Кыскасы ахыбал оорлоп бараткансыйт. Баарынан да Абылгазиевге кыйын болду. Колу-буту байланган адам эч нерсе кылалбайт эмеспи, деп "Ачык саясат" гезити өз пикирин коомчулукка жарыялаган.

Булак: NazarNews.kg