Кабмин төрагасы Акылбек Жапаров Бишкек шаарынын жана борбор калаа менен чектеш Чүй облусунун аймагындагы суу жетпей жаткан жерлерди кыдырып, эл менен жолугушту. Карапайым калк эки айдан бери суусуз отурушканын, ачкачылык жарыялайлы дешсе ансыз да ачка алышканын, согуш учурунда немистер да мынчалык кыйнашпаганын, жада калса график менен суу бере албай жаткан бийликке нааразы экенин Жапаровдун бетине айтышты. 

Бирок, кандай болгондо дагы суудан кургак чыккан, самындай колго токтобой жылмышкан Акылбек Жапаров: "Мен Казакстандын премьер-министри менен сүйлөштүм, аларда дагы суу тартыш экен. Сабыр кылгыла 3 жылда чечебиз", -  оозун куру чөп менен аарчыды. Кыргызстанда көйгөй чечилбей чирип жатса, башка өлкөлөрдө деле абал ушундай деген шылтоону кыйналып-кысталбай айткандан уялбаган чоңдор, башка өлкөдөгү айлык жогору, жашоо жакшы экенин эмнеге мисал кылгылары келишпейт?  Мисал кылышса эле көйгөйүн айтышат, өнүгүү тууралуу ооз ачышпайт. 

Казакстанда Кыргызстандай суу кенен эмес. Жапаров эмнеге Казакстандан суу алып жаткансып аларды мисал кылат. Жок жерден дагы каратып туруп элдин көзүн жазгырып манипуляция кылып жатат. "Үч жыл сабыр кылгыла" дейт. Ага чейин Апенди айткандай "эшек өлөт же Жапаров иштен кетет..." Же түбөлүккө эл башкарам деп ойлойбу?..Минтип өмүр бою кызматта турчудай сүйлөп жатканына караганда, Акылбек Жапаров кийинки президенттике даярданып жатыптыр деген сөздөр жөн жеринен айтылып жатпаса керек.

Жөнөкөй суу маселесин чече албай, элди салык менен тоноп, жон терисин сыйрып жаткан Акылбек Жапаров президент болсо элди тентитип жиберет го. Ансыз да эки жылда чет өлкөлөргө кыргыз жарандарын ишке орноштуруп жатабыз деп мандикер кылып кулчулукка жөнөтүп жатышканын жетишкендик катары пиарлап келишет.

«Кыргыз өңү Чокморовдун өңүндөй» -деп классик акын Жолон Мамытов таамай белгилеген. «Коррупционер өңү Жапаровдун өңүндөйбү» деген ой туулат, атасы казына таштап кетпеген Жапаров политехти бүтүп алып улам-улам минфин болуп, миллионерге айланды. Себеби ким бийликте турса ошонун партиясына махабатын арнап жүрүп, ХИПК сыяктуу элге каршы программаларды колдоп, бир тыйын дегенде тоголонуп жүрдү. Сөзүбүз кур болбосун үчүн фактыга келели. СДПК партиясында штаб башчысы болгон. Андан «Жаңы Кыргызстанга» секирди, аны сатып «Ак Жолго» кирип, бир саат болсо да премьер-министр болду. Таластын кыраандары «эмдеп» койолу деди эле, жоолук салынып алып катынча качып «эмделбей» калды. Иниси чала-була «эмделип» анысын акча менен сатып алды. Түз эле Куловдун «Ар-Намыс» партиясына кирип, Атамбаевдин убагында экинчи ирет минфин болгон.Эл артка кетти, Жапаров өз акчасын көбөйтө баштады. Мугалим, доктурлардын айлыгын бир тыйынга да көтөргөн жок. «Ар-Намыстын»  иши бүтөрүн келемиштей сезип «Бир болго» өткөн. «Бир болду» сызга отургузуп 2020-жылы «Мекеним Кыргызстанга» сызайын деди эле алар жолотпой койду. Эми минкаб чычкан аңдыган мышыктай бийликти мыкчып турган «доссекретарь» Ташиевдин «Кыргыз эл Баатырын» алганына көзү өтүп мен «Кыргыз эл Баатырын» качан алам деп ичи өтүп жүрөт. Ага бул наам берилеби, же кызматынан айдалабы бир кудай билет...