Айбек Мырза аз иштеди. Аз иштесе да, саз иштеди. Ишке ашпай турган долбоорлорду айтып популисттикке барган жок. Мындай пикирин журналист Бакай Абдымалик билдирди.

«Адамкерчилик баары бир жеңет ...

Ак менен кара аралашкан оомал-төкмөл дүйнөдө баары бир адамгерчилик жеңерине, бүгүн дагы бир жолу ынандым. Көрсө, көрөңгөсү бийик инсан, ар бир адамга аяр мамиле жасап көпөлөктүн кантынан да үлбүрөк көңүлдү жабыркатып албоого аракет кылат тура.

Бүгүн, Айбек Бузурманкулов башка ишке өткөндүгүнө байланыштуу ыйгарым укуктуу өкүл   кызматын өткөрүп берди. «Кызмат» - деген колдун кири... Бирок, кеп башкада.

Жаңы өкүл Бакыт Нарбековду расмий тааныштыруудан кийин, Айбек Бузурманкулов эл менен коштошуп чыгып кеткен эле. Беш ай чогуу иштешкен кесиптештери улам бири телефон чалып жатып Айбек Бузурманкулов менен коштошууну самап жатышты.

Акыркы жолугушуу өтө эмоцианалдуу болду. Эч кандай шаан-шөкөтү, коркок билиштиги же кошоматчылыгы жок жүрөктөн чыккан сөздөр, жүрөкө жетти. Көпчүлүк кесиптештер көздөрүнө жаш алууга чейин барды.

Көрсө, Айбек Мыразакримович, чочоңдогон чоңдук мамиле менен эмес, ары маданиятуу, ары адамкерчиликтүү мамиле менен ар бир кызматкердин жүрөгүнүн түпкүрүнөн орун алууга үлгүргөн экен.

Айбек Мырза аз иштеди. Аз иштесе да, саз иштеди. Ишке ашпай турган долбоорлорду айтып популисттикке барган жок. Өкүлчүлүктүн мүмкүнчүлүктөрүнүн алкагында, иш алып барып өзүнүн жетечилик бийик сапатын көрсөтө алды. Эң негизги абийрдүүлүк менен таза иштеди.

Ыйгарым укуктуу өклүчүлүктүн жалпы жамааты Айбек Бузурмункуловдун жаңы кызматына ийгилик каалайт!», - деп белгилеген ал.

Булак: NazarNews.kg