Социалдык өнүгүү министри Таалайкүл Исакунова 2017-жылы премьер-министрден уруксат албай, дипломатиялык паспортту колдонуу менен АКШга барганы аныкталды. Бул тууралуу Башкы прокуратура өз текшерүүсүнүн жыйынтыгына таянып билдирүү таратты деп жазат "Азаттык".

Маалыматка ылайык, Исакунова былтыр 6-9-ноябрда эмгек өргүүсүндө болуп, алгач АКШга, андан соң Аргентинага сапар менен барган. Мындан сырткары өкмөттүн каршылыгына карабай Таалайкүл Исакунова былтыр Санкт-Петербургдагы жыйынга катышып келген.

Ошондой эле Башкы прокуратура жакында жаңжал менен иштен бошотулган социалдык өнүгүү министринин орун басары Зууракан Каденова Иран жана Түштүк Кореяга сапары учурунда дипломатиялык паспортту жеке иштери үчүн колдонгонун кабарлады.

Башкы көзөмөл органдын маалыматы боюнча, 2017-жылдан быйылкы жылдын сентябрына чейин Социалдык өнүгүү министрлигинин жетекчилери 26 жолу чет өлкөгө сапарга чыгышкан. Алардын ичинен министр Исакунова тогуз жолу, орун басарлары Зууракан Каденова он жолу, Лунара Мамытова үч, Жылдыз Полотова төрт жолу сапарга чыккан.

Чет элдик сапарга чыккан соң аталган жетекчилери эрежеге ылайык Тышкы иштер министрлигине маалымат берген эмес, ал эми Таалайкүл Исакунова жана Лунара Мамытова дипломатиялык паспортун тапшырган эмес.

Буга байланыштуу Башкы прокуратура кыргыз өкмөтүнө жогорудагы мыйзам бузууларды четтетүү үчүн сунуш берген.

Буга чейин Жогорку Кеңештин депутаты Аида Касымалиева "Эмгек жана социалдык өнүгүү министрлигинин жетекчилеринин чет өлкөлөргө саякаттарын текшерүү зарыл" деп билдирген. Анын айтымында, катардагы адистер чакырылган иш-чараларга министр жана анын орун басарлары өздөрү барып жүрүшкөн. Социалдык өнүгүү министрлиги бул маалыматты четке кагып келген. 

Булак: NazarNews.kg