Баткен облусунун бардык саламаттык сактоо уюмдары күчөтүлгөн тартипке өттү. Кырдаал тынч эмес. Он тез медициналык жардам бригадасы, кан жана компоненттер даярдалган.

Баткен облустук бириккен ооруканасына Кадамжай шаардык жалпы дарыгерлер практика борборунан хирург, реанимация адиси жана травматологдон турган дарыгерлер тобу жана Кызыл-Кыя шаардык жалпы дарыгерлер практика борборунан дагы бир бригада келди. Ошондой эле Ош облусунан да дарыгерлерден турган эки бригада келе жатат. Бул тууралуу КР Президентинин Баткен облусундагы ыйгарым укуктуу өкүлүнүн басма сөз кызматы билдирди.

Баткен облусунун саламаттыкты сактоо боюнча координатору Арзыбек Бөрүбековдун маалыматы боюнча Баткен облустук үй-бүлөлүк дарыгерлер борборунун эки тез жардам унаасы менен жаракат алган төрт аскер Баткен облустук бириккен ооруканасына Көк-Таш айылынан келип түшкөн.

-- Баткен району Ак-Татыр, Орто –Боз, Жака-Өрүк, Үч-Дөбө, Ак-Татыр, Ак-Сай, Таш-Тумшук, Самаркандек айылдарында жергиликтүү тургундарды жергиликтүү бийлик тарабынан Баткен шаарына жана Рават айылы тарапка эвакуациялоо жүргүзүлүп, мектептерге орношууда. Баткен шаарына эвакуацияланган жарандар тамак-аш менен камсыздалууда. Бизге жеткен маалыматтарга караганда тажик тараптан брондолгон аскердик оор техникалар чек арага жакындап келишүүдө. Албетте кышкысын  жаш балдарга оор болду. Ыйлаган энелер менен балдар,  - дейт жергиликтүү тургундардын бири.Ошондой эле, Кыргыз Республикасынын Улуттук коопсуздук мамлекеттик комитетинин Чек ара кызматынын маалымат жана коммуникациялар башкармалыгы саат 21.45те тажик тараптын демилгеси менен КР УКМКнын төрагасынын биринчи орун басары, Чек ара кызматынын директору генерал-майор Уларбек Шаршеев менен Тажикстандын УКМКсынын Чек ара аскерлигинин кол башчысы генерал-полковник Раджабали Рахмонали телефон аркылуу сүйлөшүшкөндүгүн маалымдалганы менен эч кандай майнап чыккан эмес.

Тажик тарап кыргыз аскер кызматкерлери тарапка маал-маалы менен КР ИИМдин Ички Аскерлеринин жайгашкан жерин көздөй ок чыгарышууда. Ал эми Эки-Таш, Кум-Базар, Чыр-Дөбө жерлигинде ок атышуу уланып жатат.

Булак: NazarNews.kg