Белгилүү дипломат Эрик Асаналиев көз жумду

Журналист: КУМАРА САГЫНАЛИЕВА

11.09.2020, 23:12

25728

кылмыш жана кырсык

Кыргызстандын атайын жана ыйгарым укуктуу элчиси, дипломат Эрик Асаналиев узак оорудан кийин 61 жаш курагында Бишкек шаарында 11-сентябрда каза болду. Бул тууралуу маркумдун кызы Бермет Эрик «Азаттык» радиосуна кабарлаган.

Маркумдун сөөгү 13-сентябрда Түп районундагы өзү туулуп-өскөн Ак-Булуң айылында жерге берилет.

Эрик Асаналиев 1959-жылы 2-майда туулган. 1980-жылы Кыргыз улуттук университетинде журналисттик адистикке ээ болуп, 1985-жылы СССРдин Мамлекеттик коопсуздук комитетинин (КГБ) эки жылдык жогорку мектебин аяктаган.

Эмгек жолун журналист болуп иштөөдөн баштап, кийинчерээк атайын кызматта ишмердигин уланткан.

1993-1994-жылдары Кыргызстандын Коргоо министрлигинин Аскердик чалгын башкармалыгында бөлүм башчы;

1994-1997-жылдары Тышкы иштер министрлигинин өзгөчө тапшырмалар боюнча элчи;

1997-2001-жылдары Кыргызстандын Тажикстандагы, 2010-2012-жылдары Беларустагы, Литвадагы жана Латвиядагы элчиси болуп турган.

Соңку жылдары Тышкы иштер министрлигине караштуу «Кыргызстандын дипломаттары» коомдук бирикмесин жетектеп келаткан.

Кыргыз, орус тилдеринен тышкары француз тилинде эркин сүйлөгөн.

Маркумдун артында эки кыз, бир уулу калды.

Булак: NazarNews.kg