АКШнын Юстиция министрлиги америкалык мыйзам чыгаруучулардан Орусиянын активдерин Украинанын пайдасына конфискациялоого уруксат берүүнү суранууда. Бул тууралуу Орусиянын активдерин аныктоо жана конфискациялоо боюнча жумушчу топтун жетекчиси Эндрю Адамс тараткан билдирүүдө айтылат.

«Бул орусиялык ишкерлердин конфискацияланган активдеринен түшкөн каражаттарды Орусиянын агрессиясынан улам келтирилген зыяндын ордун толтуруу үчүн Украинага которууга мүмкүндүк берген демилге», - деди Адамс.

Анын айтымында, мындай мүмкүнчүлүк конфискацияланган каражаттар Украинага келтирилген зыяндын ордун толтурууга жумшалган учурда Юстиция министрлигинин ресурстарын жана куралдарын кеңейтет.

Топтун лидери түшүндүргөндөй, мындай ыйгарым укуктарды берүү АКШнын көптөгөн мыйзамдарына конфискацияланган каражаттарды колдонууну жөнгө салуучу өзгөртүүлөрдү талап кылат.

Адамстын айтымында, анын тобу Орусиянын катышуусу менен АКШнын экспорттук көзөмөл мыйзамдарынын бузулушун, ошондой эле Орусиянын акыркы колдонуучуларына АКШнын экспорттук көзөмөл мыйзамдарын айланып өтүүгө аракет кылган сатып алуу түйүндөрүн жана ортомчуларын аныктап жатат.

Ал ошондой эле АКШнын Орусияга каршы санкцияларын айланып өтүүгө багытталган транзакцияларды үгүттөгөн же ишке ашырган жеке жана юридикалык жактарды, ошондой эле орусиялык ишкерлердин арам акчаны адалдоо фактыларын иликтейт.

Орусиянын Тышкы иштер министрлигинин Түндүк Америка департаментинин директору Александр Дарчиевдин ТАСС агенттигине билдиргенине караганда, АКШ бийлигинин орус активдерин Украинанын пайдасына конфискациялоосу Москва менен Вашингтондун ортосундагы эки тараптуу мамилелерди акыры токтотот.

Ал белгилегендей, эки тараптуу мамилелердин азыркы реалдуулугунда Орусия менен тигил же бул жол менен байланышкан бардык активдер, анын ичинде дипломатиялык менчик жогорку тобокелчиликке кабылат.

Булак: NazarNews.kg