Бишкекте Киев көчөсүнүн дээрлик толугу менен жөө жүрүүчү аймакка айланышы мүмкүн. Бул өзгөрүүлөр борбор калааны 2050-жылга чейинки өнүктүрүүнүн жаңы Башкы планына киргизилген.

Долбоорго ылайык, жөө жүрүүчү аймактын узундугу болжол менен 3,3 чакырымды түзөт. Ал Бейшеналиева көчөсүнөн Абдрахманов көчөсүнө чейин болот. Ошол эле учурда Киев көчөсүндө коомдук транспорттун каттамы сакталат. Жаңыланган мейкиндикте автобустар жана муниципалдык транспорт үчүн өзүнчө тилке каралат.

Шаар бийлиги долбоордун негизги максаты — борбордогу автоунаа жүгүн азайтуу, экологиялык абалды жакшыртуу жана тургундар менен туристтер үчүн ыңгайлуу шаардык чөйрө түзүү экенин билдирүүдө. Архитекторлордун планы боюнча Киев көчөсү заманбап шаардык бульварга айланып, кең тротуарлар, жашыл зоналар, эс алуу жайлары жана жөө адамдар менен велосипедчилер үчүн коопсуз инфраструктура менен жабдылат.

Долбоор ишке ашса, шаардын борборундагы бизнес жана коомдук мейкиндиктердин өнүгүшүнө да оң таасир берет деп күтүлүүдө. Келечектеги жөө жүрүүчү аймактын боюндагы кафе, дүкөн жана кызмат көрсөтүүчү жайлар жөө адамдардын агымы көбөйгөндүктөн жаңы кардарларга ээ болушу мүмкүн.

Бул демилге шаар тургундарынын арасында талкуу жаратты. Айрымдар Бишкекке заманбап жөө жүрүүчү борбор керек деп эсептесе, башкалары Киев көчөсүндө автоунаалар чектелсе, коңшу көчөлөрдө тыгын көбөйүшү мүмкүн деп кооптонушууда.