Түндүк Кореянын Конституциясында мындан ары Түштүк Корея менен кайра биригүүгө умтулуу тууралуу пункт камтылбайт. Документтин жаңыланган версиясын Түштүк Кореянын Биригүү иштери боюнча министрлиги пресс-конференцияда сунуштап, аны менен Франциянын эл аралык маалымат агенттиги (AFP агенттиги) таанышып чыккан.

Документте «мекенди бириктирүү үчүн күрөшөт» деген жобо акыркы версияда жок.

Конституцияга киргизилген өзгөртүүлөр март айында жасалганы айтылат. Эки Кореяны бириктирүү тууралуу пункт алынып салынгандан тышкары, документке Түндүк Кореянын чек аралары жана аймактык бүтүндүгү тууралуу жаңы берене кошулган. Анда Түндүк Корея «өз аймагына болгон эң кичинекей да кол салууга эч кандай шартта жол бербейт» деп баса белгиленген.

«Биригүү тууралуу сөздөрдү алып салуу менен Түндүк Корея эми Түштүк Кореянын аймагына доомат койбой турганын ачык билдиргендей болду», — деп эсептейт Сеулдагы Түндүк Корея изилдөөлөр университетинин профессору Ян Му-джин. Анын сөздөрүн AFP келтирген. Анын пикиринде, Пхеньян «Түштүк да Түндүк Кореянын аймагына кол салбайт деп күтөт».

2025–2026-жылдары Түндүк Корея лидери Ким Чен Ын Түштүк Кореяны бир нече жолу «эң душман мамлекет» деп атаган. Мындай акыркы билдирүү март айында Корея эмгек партиясынын съездиндеги негизги сөзүндө айтылган. Бир аз мурдараак Ким Чен Ын Түндүк Кореянын «Түштүк Корея менен эч кандай байланышы жок» экенин билдирген.

Техникалык жактан алганда, эки өлкө азыркыга чейин согуш абалында. Анткени 1953-жылкы жаңжал тынчтык келишими менен эмес, жөн гана ок атышууну токтотуу келишими менен аяктаган.