Бишкек шаарынын мэри Айбек Жунушалиевдин буйругу менен Русланбек Акылбеков башка ишке өткөндүгүнө байланыштуу транспорт боюнча вице-мэр кызматынан бошотулду. Бул тууралуу борбор калаанын мэриясынын басма сөз кызматы билдирди.

Борбор калаанын мэринин башка буйругу менен Талайбек Орозов санариптештирүү жана транспорт боюнча вице-мэр болуп дайындалды.

Белгилүү болгондой, Орозов бир кезде "Кыргызтелеком" ААКтын директорлор кеңешин, "Инфоком" мамлекеттик ишканасын жетектеген. 2021-жылы ал эки ай бою өкмөттүн алдындагы Санариптик өнүктүрүү боюнча мамлекеттик кызматтын төрагасы болгон.

Орозов 1974-жылы туулган. Кесиби боюнча - инженер-механик, ал ошондой эле жүргүнчүлөрдү жана жүк ташуучу унааларды тейлөөнү тастыктоо боюнча эксперт. Кыргыз техникалык университетин бүтүргөн.

Булак: NazarNews.kg