Бүгүн Бишкек шаарынын Токтоналиев көчөсүндөгү дарактардын кыйылышына каршы болуп жарандык активисттер жана айрым тургундар балдары менен нааразылыкка чыгышты. Милиция бир нече кишини кармап кетти.

Активисттер жолго отуруп алышып, мэриядан дарактарды кыюуну токтотууну талап кылышты. Алардын айтымында, шаар бийлиги экологияга зыян келтирүү менен мыйзамсыз түрдө көчөлөрдү кеңейтишүүдө. Жарандар Бишкек шаарынын мэри Албек Ибраимовду бактар кыйылып жаткан жерге чакырып, мындай кадамдардын зарылчылыгын түшүндүрүп берүүнү талап кылышты.

Милиция жолду бошотууну талап кылды, бирок чогулгандар буга макул болушкан жок. Жыйынтыгында тартип сакчылары 10 кишини кармап Биринчи Май РИИБне алып кетишти.

Жергиликтүү жашоочулар милиция жарандардын укугун коргоонун ордуна аларга каршы чыгып жатышканына нааразы болушууда. “Элди ойлогула, экологияны ойлогула. Анысыз деле шаар мурдагыдай жашыл эмес. Баары асфальт төшөп алгылары келет”,-деди жашоочулардын бири.

Бишкектин вице-мэри Бакыт Дүйшөмбиев бул жолду куруу өтө зарыл экенин билдирди. Анын айтымында, Тынчтык жана Совет проспектилеринин ортосунда ортосунда дагы бир көчө алып өтүү зарылдыгы бар - бүгүнкү күндө аталган көчөлөрдө унаа өтө көп жана аларды башка жерлерге бөлүштүрүү керек. «Курула турган жерде 143 бак бар. Биз алардын ордуна жаңы бактарды отургузабыз», - деди ал.

Буга чейин Бишкектин Чыгыш-5 кичи районунун тургундары дагы нааразылыгын билдиришкен. Бул райондо 800 түп дарак кыйылары айтылган.

Булак: centralasian.org