Бириккен Улуттар Уюмуна болгон мүчө мамлекеттердин карызы дээрлик 1,6 миллиард долларга жетти. Карыздарды төлөөдөгү өнөкөт кечигүүлөр БУУнун натыйжалуу иштөө мүмкүнчүлүгүнө тоскоол болууда. Бул тууралуу уюмдун басма сөз кызматы билдирди.

Маалыматтарга ылайык, БУУ 2024-жылды 760 миллион доллар төлөнбөгөн төгүмдөр менен аяктады, анын көпчүлүк бөлүгү азырынча кайтарыла элек. Ошондой эле, 2025-жылга төлөнүүгө тийиш болгон 877 миллион доллар уюмга али түшө элек. Ошентип, жалпы карыз 1,586 миллиард долларды түзөт.

Жыл аягына беш жумадан аз убакыт калганда, 193 өлкөнүн 145и гана 2025-жылга мүчөлүк акысын толук төлөштү. АКШ баштаган бир катар ири өлкөлөр төлөмдөрүн төлөй элек, ал эми Кытай 29-октябрда толук сумманы төлөдү. Орусия дагы төгүмдөрүн төлөй элек өлкөлөрдүн катарында.

"Мен мамлекеттерди төгүмдөрүн толук жана өз убагында төлөөгө бир нече жолу чакырдым", - деди БУУнун башкы катчысы Антониу Гутерриш.

БУУнун 2026-жылга карата туруктуу бюджети 3,238 миллиард долларды түзөрү кабарланууда. Бул 2025-жылга салыштырмалуу 577 миллион долларга (15,1 пайызга) аз. Планга 2681 кызмат ордун же учурдагы деңгээлдин 18,8 пайызын кыскартуу кирет.

Атайын саясий миссиялар дагы быйылкы көрсөткүчтөргө салыштырмалуу 21 пайыздан ашык кыскарууга дуушар болушат. Бул негизинен айрым миссиялардын жабылышына жана кызматкерлердин санын оптималдаштырууга байланыштуу.

Чыгымдардын натыйжалуулугун жогорулатуу чараларын күчөтүү максатында БУУ эмгек акыны эсепке алууну бирдиктүү глобалдык системага бириктирүүнү, ошондой эле Нью-Йоркто жана Бангкокто жалпы административдик борборлорду түзүүнү пландаштырууда.

Уюм ошондой эле катчылыкты чыгымдары аз аймактарга көчүрүү мүмкүнчүлүгүн изилдеп жатат. 2017-жылдан бери Нью-Йорктогу ижара келишимдерин жокко чыгаруу БУУга 126 миллион доллар үнөмдөөгө мүмкүндүк берди. 2028-жылга чейин жыл сайын кошумча 24,5 миллион доллар үнөмдөлөт деп күтүлүүдө.