Чагылган учурунда коопсуздук чараларын билесизби? Көрсө, биздин үй чагылганга такыр чеп эмес экен! Күн күркүрөгөн учурда үйдө бизди кандай коркунучтар күтүп турганын тизмелейбиз ...

Үй - күн күркүрөгөндө баш калкалоо үчүн эң коопсуз жайлардын бири. Бирок бул жерде да коопсуздук чаралары көрүлүшү керек. АКШнын Океандык жана атмосфералык изилдөөлөр боюнча улуттук башкармалыгы күн күркүрөп, терезенин сыртында чагылган жарк этсе, эч качан кылбоо керек болгон нерселердин тизмесин жарыялады:

Колду же идиштерди жууганга болбойт;

душка же ваннага түшүүгө болбойт;

идиш жуугуч жана кир жуугуч машинаны колдонууга болбойт;

Телефон чалууга болбойт;

Башка электр приборлорун колдонууда да абайлоо керек.

Жогоруда айтылгандардын бардыгынын жалпылыгы бар: алардын баары сууга же электр энергиясына байланыштуу.

"Эгер үйгө чагылган тийсе, зымдардан же суу түтүктөрүнөн өтүп кетет. Ошентип, розеткага же түтүк тутумуна кошулган нерселердин баары ток тартуусу мүмкүн. Үйдөгү бардык суу түтүктөрү чагылгандын соккусуна дуушар болот", - деп түшүндүрөт АКШнын Улуттук Аба ырайы кызматынын коопсуздук боюнча адиси Жон Йенсениус.

Чагылган түз эле үйгө сокку урбастан, коммуникациялар өткөн жерден бир нече метр аралыкта сокку ура алат. Күн күркүрөгөнүн уксаңыз, бул чагылган жакын экенин билдирет. Бул сантехникадан жана электр энергиясынан мүмкүн болушунча алысыраак жылыш үчүн белги болушу керек.

Бардык түзмөктөрдү күн күркүрөгөндөн 30 мүнөттөн кем эмес убакыттан кийин кайра колдонууга болот.

"Бул бир аз ыңгайсыз, бирок бул коопсуздук үчүн ыңгайсыздык", - деп баса белгилейт Йенсениус.

2017-жылдын июль айында 17 жаштагы америкалык Вера Мобли кафеде жумуш ордунда идиш жууп жатып, күн күркүрөй баштаган. Акыркы тарелка менен калганда колун сууга салып, ошол эле маалда жаркыраган жарыкты көрүп, эсин жоготкон. Чагылган имаратка түздөн-түз тийип, ага суу краны аркылуу сокку урган. Веранын бут кийиминде тешик пайда болуп, буту катуу күйгөн, бирок, бактыга жараша, ал аман калган.

Булак: NazarNews.kg