Бүгүн Жогорку Кеңештин беш фракциясы спикерге Чыңгыз Айдарбековду Эл аралык иштер, коргоо жана миграция боюнча комитеттин төрагалыгынан алуу чечимин жөнөттү.

Парламентарий кесиптештеринин жоруктары боюнча маалымат каражаттарына комментарий берди. Чыңгыз Айдарбековдун айтымында, бул тууралуу өзү бүгүн билди.

"Мен бул тууралуу жаңы эле билдим. Угушума караганда, беш фракция мага ишеним көрсөтпөө боюнча өтүнүчтөрдү берип жатат. Бул маселе күн тартибине киргизилди. Мендеги маалымат боюнча түшкү тамакка чейин талкууланат. Кандай болгон күндө да мен депутаттарга, коомчулукка бардык маалыматтарды бердим. Процедуралык маселелер боюнча, жыйынды өткөрүү боюнча бардыгы регламенттин негизинде жүргүзүлдү. Бирок мен бардык документтер жок экенин, регламенттин 86-беренеси бузулуп жатканын комитеттин бардык мүчөлөрүнө билдирдим. Комитеттин депутаттарынын сунушу менен бул маселе күн тартибине киргизилип, көпчүлүк добуш менен жактырылды", - дейт Ч.Айдарбеков.

Комитеттин жетекчиси кызматтан кетүүгө даяр экенин билдирди.

"Адилеттүүлүк үчүн бул этаптан да өтүшү керек деп ойлойм. Документтер толук берилген эмес. Мен аларды кечээ эле карап чыктым, ал тургай бул толук пакет эмес. Алар боюнча азыртан эле суроолор бар. Айрыкча суу сактагычка байланыштуу көптөгөн суроолор туулат. Тарыхый документтер боюнча бул жер биздин жер экен", - деди Чыңгыз Айдарбеков.

Эске салсак, эл аралык иштер, коргоо жана миграция боюнча комитеттин жетекчиси Чыңгыз Айдарбеков кыргыз-өзбек мамлекеттик чек арасынын айрым тилкелерин делимитациялоо боюнча макулдашуу долбоорун колдоо маселесин караган жыйында кабыл алынган протоколго кол коюудан баш тарткан.

Буга чейин комитеттин алты мүчөсү келишимдин долбоорун жактырган, ага ылайык Кемпир-Абад суу сактагычынын астындагы 4485 гектар жер Өзбекстанга өтүп, Кыргызстан 19699 гектар жерди алат.

Булак: NazarNews.kg