Бүгүн, 18-июндан тарта Бишкекте «Спутник V» вакцинасы менен коронавируска каршы эмдөөдөн өтүүгө болот. Бул маалыматты Саламаттыкты сактоо жана социалдык өнүктүрүү министрлиги билдирди.

Кыргызстанга 17-июнда кечинде Россияда өндүрүлгөн «Спутник V» («Гам-КОВИД-Вак») вакцинасынын экинчи партиясы алынып келген. Бул ирет 40 миң адамды коронавирустан эмдөө үчүн 80 миң доза жеткирилди.

«Медиктер, өнөкөт оору менен жабыркгана жарандар жана 60 жаштан жогоркулар эмделет. Эмдөө Бишкектеги №2, 3, 6, 7, 8 үй-бүлөлүк медицина борборлорунда жүрөт», - деп айтылат маалыматта.

Министрликтин маалыматы боюнча, алгач 25 миң дозасы Бишкек шаарындагы эмдөө пункттарына бөлүштүрүлмөк. Андан кийин аймактарга жөнөтүлүп баштайт.

Вакцинаны сатып алуу үчүн республикалык бюджеттен жалпы 70 млн сомдой каражат бөлүнгөн.

Булак: NazarNews.kg