Жогорку Кеңештин депутаты Нурбек Сыдыгалиев  «75чилердин каты» деп аталган иш боюнча пикирин билдирди. 

Ал Камчыбек Ташиев жана Курманкул Зулушев 15-июнда соттук отурумда депутат Элвира Сурабалдиеваны «суракка алышты» деп эсептейт.

Анын айтымында, Жогорку Кеңештин депутатынын соттук процессте күбө катары катышуусу мыйзамдын үстөмдүгүнөн кабар берет, анткени депутат өзүнүн статусуна таянбастан, сотко келип, башка жарандар менен тең укукта көрсөтмө берди.

Депутат белгилегендей, Кыргызстан укуктук мамлекет, ошондуктан мыйзам статусуна карабастан бардык жарандар үчүн бирдей.

Ошону менен бирге ал айыпталуучулардын жүрүм-турумуна нааразычылыгын билдирип, депутаттын үстүнөн үстөмдүк кылууга аракеттенүү жана ага моралдык басым көрсөтүү коомдо гана эмес, өзүндө да терс пикир жаратканын айтты.

Анын пикиринде, Камчыбек Ташиев жана Курманкул Зулушев мыйзамды сыйлабай күбөнү суракка алып, ага психологиялык басым көрсөтүшкөн, бул, анын пикиринде, мыйзам бузуу болуп саналат.

Соттун аракеттерине комментарий берип жатып, ал Жазык-процессуалдык кодекси процесстин бардык катышуучуларынын жүрүм-турумун так жөнгө саларын жана төрагалык кылуучу судья тараптар үчүн бирдей мүмкүнчүлүктөрдү камсыз кылууга милдеттүү экенин билдирди.

«Судья болуп жаткан окуяны көрүп туруп, мыйзамда каралган чараларды көрүшү керек болчу», - деди ал.

Ошондой эле депутат Эмилбек Узакбаевдин адвокаты Акынбек Ногоевдин: «75 кишинин катын» уюштургандар эркиндикте жүрүшөт, көмөктөштү деп айыпталган адамдар гана камакта отурушат», - деген билдирүүсүнө комментарий берди.

Депутат укук коргоо жана сот органдарынын ишине баа бере албасын айтты. Анын пикиринде, мыйзам боюнча оор жана өзгөчө оор кылмыштарды жасоого айыпталган адамдар камакка алынат. Ал баарына карата бөгөт коюу чаралары өзгөртүлүп, алар камакка алынышы керек деп эсептейт.