Израиль Ирандын Каспий деңизинде жайгашкан стратегиялык портуна сокку урду.

The Wall Street Journal гезити билдиргендей, чабуул Бендер-Энзели портуна багытталган жана Израилдин Каспий аймагына жасаган алгачкы аскердик соккусу катары бааланууда.

Маалыматка ылайык, аталган порт Иран менен Россиянын ортосундагы маанилүү логистикалык борбор болгон. Бул жер аркылуу мунай, дан, ошондой эле курал-жарак жана учкучсуз учуучу аппараттар ташылганы айтылууда. Белгиленгендей, 2023-жылы гана ушул маршрут аркылуу Ирандан Россияга 300 миңден ашуун артиллериялык снаряд жана болжол менен 1 миллион ок-дары жөнөтүлгөн.

Израиль тараптын билдирүүсүнө ылайык, сокку порттогу аскердик объекттерге багытталган. Чабуулдун натыйжасында аскердик кемелер, порттун инфраструктурасы, командалык борбор жана кеме оңдоо заводу жабыркаган. Жайылтылган кадрларда Ирандын деңиз күчтөрүнүн штабына зыян келтирилип, бир катар кемелер жок кылынганы көрүнөт.

Эксперттер белгилешкендей, бул порт аркылуу жүргүзүлгөн аскердик ташуулар жарандык соода, айрыкча дан ташуулар менен тыгыз байланышта. Ошондуктан бул сокку аскердик гана эмес, азык-түлүк камсыздоого да коркунуч жаратышы мүмкүн.

Аналитиктердин айтымында, акыркы бир жыл ичинде Бендер-Энзели порту аркылуу жүк ташуулардын көлөмү кескин өсүп, болжол менен үч эсеге көбөйгөн. Бул анын стратегиялык маанисин дагы да жогорулатат.

Ошентип, Израилдин Каспий аймагындагы бул биринчи соккусу Иран үчүн гана эмес, Россия менен болгон аскердик-логистикалык байланыштарга да олуттуу таасир тийгизиши мүмкүн болгон окуя катары бааланууда.